Shillong: Ka Dorbar Hima Sohra kaba la long ha ka 4 tarik Rymphang 2026 ka la kyntu ia ka KHADC ba kan pynsted ia ki kam ki jam khnang ban ioh noh ia u Syiem ka Hima.
Ia kane ka dorbar la khot u Acting Chief uba thung ka KHADC bah Mynjurlang Majaw ban pyntip ia ka sanad kaba la ai ka KHADC ia u ban treikam kat bym pat ioh ia u Syiem.
Ka KHADC kala thung Acting Chief hadien ba ka la kyntait ban ai sanad ia u Marremdor Syiem uba la jied Dorbar Hima da kaba ai daw ba kam long kaba iaid beit.
Hadien ba la wai ka Dorbar, u Acting Chief u bah Mynjurlang ula pyntip ba ha ka jingshisha ka dorbar Hima mynshwa ka mynjur ia u Marremdor Syiem ha kaba ma u ruh ula iadon bynta lang hynrei namar ba ka KHADC kam pat sngew biang ka pynslem ban ai sanad.
Haba pyntip ia ka rai ka dorbar Hima hadien ba la wai ka dorbar Hima, u myntri Mynjurlang ula ong ba ka jingkhot dorbar jongu, ka long ban pynshai ia ka sanad kaba ai ka KHADC ia u bad ka jingjied ia ki 8 ngut ki Executive Members nalor 12 ngut ki myntri ban iapyrkhat kam jong ka Hima hapoh ka jingialam jongu kum u Acting Chief.
Haba iadei bad ka jingjied ia u Syiem ka Hima, u Acting Chief ula ong ba un pyrshang ban pynsted ban ioh noh ia u Syiem ba pura lyngba ka jingiatreilang bad ka KHADC namar ba Hima khlem u Syiem kam lah ban pyniaid ia ki kam ki jam ka Hima.
Ula ong ba ka kam jongu, ka long ban lum ban lang ban pyniaid ia ka kam, ban ioh noh ia u Syiem.
Katkum ka jingong u bah Mynjurlang, katkum ka riti dustur, u Syiem u dei ban long na ka kpoh ka longïing syiem bad uba dang bat dang don ha ka niam Khasi.
Ha kaba iadei bad ka jingmih ka kyrteng u P. Syiem ba kwah ban iakhun ia ka khet Syiem nalor u Marremdor Syiem, ula ong ba na ka liang ka Hima kam da don jingtip bha namar ba um ju kham ju kynduh ne wan sha ka dorbar Hima hynrei ka kyrteng ka mih na u Executive Member ka KHADC ba uta u P. Syiem u thmu ban iakhun ia ka khet Syiem Hima Sohra. Une u P. Syiem u dei ba sah sha Mairang.
Pynshai u Acting Chief ka Hima Sohra ia ka sanad ka KHADC
