Shillong: Ka iew ki nongseng kam na kane ka jylla kaba ar sngi ka la thnem bha ha State Convention Centre, Shillong na ka jingwan ki nongthied na ki 16 tylli ki ri ka pyrthei.
Ha kane ka iew, ki tiar ki tar ki dei kiba la shna bad pynmih hi kiba sengkam lajong na kane ka jylla kynthup ki tiar shna kti, bad kiwei bad ki mar kiba pynmih na kane ka jylla kum ki soh ki jhur bad kiwei.
Ia kane ka iew la pyllong ka tnad Commerce and Industries, ka sorkar Meghalaya ryngkat ka Federation of Indian Export Organisations (FIEO) bad la ai kyrteng kum ka Reverse Buyer–Seller Meet (RBSM) 2026, shi bynta ban plie lad ia ki briew na kane ka jylla ban iakynduh ia ki nongthied nabar ri ban pyniaid iew ia ki mar jongki.
Ha kane ka iew, ki don kumba 28 ngut ki nongthied nabar ri kiba mihkhmat na ki16 tylli ki ri kynthup na ka ri South Africa, Zimbabwe, Slovakia, Turkiye, Nepal, New Zealand, Russia, Bahrain, Kenya, Australia, Uganda, Gambia, Azerbaijan, Sri Lanka, Canada, bad Romania.
Kumba 100 ngut ki nongdie kiba la reijister ha ka MSME na kylleng ka jylla kila wan ban die ia ki mar jongki.
La sakhi lang da u Myntri Rangbah ka jylla Meghalaya, u Conrad K. Sangma, u symbud myntri rangbah bah Sniawbhalang Dhar, u Chief Secretary Dr. Shakil P. Ahammed bad kiwei nalor ka nongmihkhmat na ka Federation of Indian Export Organisations (FIEO), ka Neha Mehra.
Thnem ka iew ki nongseng kam ka jylla ba wan thied ki briew na ki 16 tylli ki ri
