Shillong: Ban sop ban spain ia u tynrew uba la jot, ia ki dieng kiba la tlor, ia ki siej kiba la pyut, shisien shi snem, la ju pyllong ia ka jingsap seh ïing ia ka Sieng Riti Institute, Wahkhen, kaba dei ka ïing ka shlem ka spah tynrai u Khasi.
Mynta ka sngi, la pyllong ia ka jingsap seh ïing ia ka Sieng Riti da ka jingwan shim bynta ki dkhot, ki nongiarap mon sngewbha, bad ki khynnah kiba ju shah hikai ha kane ka shlem.
Kumba ju long, mynta la pyndep ia ka jingsap sha kawei ka liang bad lashem snem pat, la sap sa sha kawei ka liang.
Ka Sieng Riti ka la iaid sha ka 24 tylli ki snem bad shen kan sa dap 25 snem kynthih ha ka jingiaid lynti jongka hapoh ka jingialam u rangbah Komik Khongjirem ryngkat kiwei, ban pynneh pynsah, ban hikai, ban kyntiew ia ka sap u mynbarim ha ka put ka tem, ka siaw ka rwai, ka shad ka kmen bad kumjuh ha kiwei kiwei ki bynta jong ka akor ka burom.
Kumba ju long, la pyllong ruh ka jingai sha ai ja ia kiba wan ban iashim bynta ha kane ka jingsap seh ïing khlem da siew bainong eiei.
Sap seh ïing ka Sieng Riti, ka shlem ka spah tynrai, ka nongmuna u Khasi
