Shillong: U myntri sorkar jylla u bah Lahkmen Rymbui ula ong ba ka jingjaboh ka wah Umngot kumba la paw ha kine ki sngi, ka lah ban dei na ka jingtuid ka khyndew na ka jingtih surok ka kompeni kaba la pyllong ia u slap ban kit ia arsut.
Haba kren mynta ka sngi, u bah Lahkmen u la ong ba ka surok naduh Laitlyngkot ka la khang katkum ka por ha ki bnai ba la dep na ka jingtwa bad ka kompeni ka la pyrshang ban pynkhuid sted ia ka surok da kaba khalah pathar tang ban pynlaid kali bad dei kane ka daw ba ka lah ban ktah ia ka um hadien ba u slap ula kit ia ka khyndew arsut.
Ula ong ba ka jingpawnam ka jingkhuid ka wah Umngot ka la pyllong ia kiba wankai ban kam lypa ne book da ki bnai ban wan peit kai hynrei ka jingsaw ka um ha kine ki sngi, ka la ktah ia kane ka kam jngohkai.
U la ong ba ha ka por slap ym lah ban ong ba ka iaid ka jingshna ia ka surok namar ba ka um ka lah ban tuid hynrei ha ka por tlang ba ka rang, ka wah ka dei ban khuid.
U bah Lahkmen ula ong ba ka jingkylla ktieh ka wah Umngot ka la ktah ia ki briew kiba ioh jingim na katei ka wah khamtam ha ka kam jngohkai namar ba ka dei kaba pawnam bha ha ka jingkhuid.
Katkum ka jingong u myntri, ka jingwan tuid ka khyndew sha wah Umngot ka dei na ka tnad wah Umsong kaba tuid ka khyndew na ka jaka tih surok narum Laitlyngkot ha ka por kaba slap. U la ong ba u symbud myntri rangbah ka jylla u la kren ia ka kompeni, ka NHIDCL ban tehlakam ia kane ka jingkylla ktieh ka wah Umngot. Halor kane, ka kompeni ka la shim ia ka lad ka lynti halor kane.
Ha kajuh ka por, u la ong ba shwa ban shna ia ka surok la shim ia ki lad ki lynti ha ka DPR bad lada don ka jingpynkhein, ka State Pollution Control Board ne kano kano ka bor jong ka ain, kan shim ia ka sienjam katkum ka ain.
Da ki bnai kam lypa ki tourist ban wan peit ia ka wah Umngot| ktah ka jingkylla ktieh: Lahkmen
