Shillong: Ka la iaid kumba ar bnai eiei mynta hynrei ka jaka ieng kali kaba la plie paidbah ban pynkiew sha jrong bun mala ha phyllaw ka Additional Secretariat, ka dang bun ba sah thylli namar ba ki trai kali ki kiar katba lah haba ioh ban pynieng ei ha surok ha lynter ka thain Secretariat.
Ha katei ka jaka ieng kali, ka don kumba 58 tylli ki jaka ban pynieng bad la khrong 20 tyngka shi kynta bad 10 tyngka man ba ieng tam.
Ia kane ka jaka ieng kali la ai kyrteng kum ka automated multi level car park bad la plie ha u Rymphang mynta u snem da u myntri rangbah ka jylla u Conrad K Sangma kaba la mang T. 6.5 klur bad la phiah 8 bynta bad ka lah ban kit ia ka jingkhia haduh 2300 kilo.
Ka sorkar ka la shna ia kane ka jaka ieng ban kham pynsting ia ka jingsahkut kali, kaba la wanrah ka jingkhapngiah na ka jingpynieng ia ki kali ha surok.
Ha ka jingiakren bad u nongap kane ka jaka ieng kali, ula iathuh ba kumba long mynta kiba wan pynieng kali ki duna bha bad ym ju lah ban pyndap beit baroh namar ba ki kali ki dang ieng ha ki surok ha katei ka thain Secretariat ba dang ioh ei bad ki salia ban wan ha katei ka jaka ba hap siew.
Ha ki sngi bym long trei lei, kiba wan pynieng kali ki duna bha ha katei ka jaka namar ba ka kham jngai na iew na hat bad dei tang ha ki sngi ba long trei ophis ba kham bun ki kali kiba wan pynieng hynrei bun kiba pynieng sha ki surok bad duna kiba wan rung ha katei ka jaka.
Dang bun ba kiar ban pynieng kali ha suin ba dang ioh ei ha surok
