Shillong: Ka jingiakhih ka Green Tech Foundation (GTF) da ka jingshah thngan ban dawa weng ia ka soskukar ka sorkar bad ka kompeni Taj Hotel, Tata Group ban tei ha Lumpongdeng, ha Umiam, ka la khring ia ki paidbah na kylleng ban wan ai mynsiem.
Ki longkmie, ki samla, ki nongialam sengbhalang, ki nongialam shnong kila wan ban ai mynsiem ia ki dkhot ka Green Tech Foundation kiba pyllong ia ka jingshah thngan ha madan Malki, Shillong.
Hynnin ka sngi hadien khyndai sngi ba u Chairman ka Green Tech Foundation u bah H. Bansiewdor Nonglang ula shah rah noh sha hospital, la mih sa u General secretary u bah Retre Lyngdoh ban bteng ia ka jingshah thngan ha katei ka jaka. Kawei ka longkmie ruh kaba dei ka nongialam ka Women Organisation Ri Bhoi District, ka kong Mary June Myrsiang ka la shah thngan lang.
La ioh ban iakren ia ki riew paidbah kiba wan ai mynsiem sha kane ka jaka shah thngan, ha kaba kila pynrem jur ia kane ka sorkar MDA-2, kaba la kuman haduh kine ki sngi. Kila ong ruh ba ka la dei ka por ia ka Green Tech Foundation ban khot noh da ka jingialum paidbah bad wat ban shim da ka sienjam kaba kham jur ban leit tur sha Secretariat ban pynbor ia kane ka sorkar ban pynurlong ia ka jingdawa jong ka Green Tech Foundation, namar ba kim sngap kim shah shkor haba iaid da ka lynti kaba jai jai.
Tuid kiba wan ai mynsiem ia kiba shah thngan, pynrem jur ia ka sorkar MDA
