Shillong: Khad khyndai snem mynshwa ha 2007, ha ka por ba long MLA u bah Martle N Mukhim, la wanrah ia ka projek ha Mynsang, kaba jngai kumba 10 km na Mawkynrew, East Khasi Hills .
Kane ka projek kan dei kum ka pliang ja ban kyntiew ia ka ioh ka kot jong ki paidbah ka thain Mynsang kaba don ki lum ki wah, bad ki jingthaw ba itynnad ka mariang. Hynrei phewse, ka jingpynkhreh ka la sahkut noh sbak khlem nongbuddien shuh hadien ba la rem noh u bah Martle.
Dang shen, ka la don ka jingpyrshang na ka shnong ban buddien biang hynrei kam pat poi shano shano ruh.
Ha ka jaka peitkai ha Ursohmian, ka jingshna ka la soh sohpailen lut, kila sah sarang bad ki nar kila dkut lut na ka jingsah khongreng katei ka jaka jngohkai kaba la shna mynshwa.
U Sordar ka Mynsang bah Joren Nongrum ula iathuh ba ka shnong Mynsang kaba don kumba 200 tnum iing, ka don shibun ki jaka jngohkai hynrei na ka jingsniew tasam ka surok, ka la pyntieng ia ki briew ban wan kai. Ha ka jingshisha, ka shnong ka la iakren ia u MLA bah Banteidor Lyngdoh uba kular ban pynbha noh hynrei khlem pat long kam satia.
“La sdang ha u snem 2007 da u bah Martle N Mukhim hynrei ka la sah kumto. Ka shnong ka don shibun ki jaka jngohkai ba itynnad hynrei, namar ba sniew palat ka surok, ka pynsalia ia ki briew ban wan. Ka thain ka don ka wah Umngot, Umtyngphar, ki lum ki wah”, la ong u bah Joren.
Sawdong ka thain 18 shnong ka Jatah Area, ki thrang ban kyntiew ia ka kam jngohkai ban kyntiew iaka ioh ka kot ki nongshong shnong. Ka don ka wah Umngot, ka wah Umtyngphar, bad ki lum ki riat. Na jrong u Ursohmian, lah ban iohi shynna ia ka them shapoh ka wah Umngot ha kaba ha ka port lang, ki saw na ka jingih u sohniamtra, por synrai pat ki jyrngam ka them na u kba bad ki dieng ki siej kiban pyniap biej ia ki khmat bad ban mad ia ka er batesi batemon.
Sarang noh ka projek ba la sdang ha 2007 ha Mynsang naduh ba shah rem bah Martle
