Babu Kular Khongjirem.
Ka sorkar Meghalaya na ka por sha ka por ka ju mlien bha ban pyndonkam ia baroh ki jaitkam da ki Nonghikai skul naduh ki nonghikai primary haduh Higher Secondary ter ter.Ka sorkar ka la shu khein niangkohnguh beit ia ki Nonghikai namar kidei kiba shu kohnguh bad ngeit sneng palat katba bthah ia ki.Kam don jingmap shuh naduh ki nonghikai ha nongkyndong haduh ki nonghikai ha sor.Naduh ka kam (duty) elekshon haduh ki kam Thoh Census la shu bynshet lut ha ki nonghikai baroh.
Dang khyndiat bnai myntra,ka sorkar Meghalaya lyngba ka tnad Community and Rural Development Block ka la pyndonkam ban thung ia ki Nonghikai ba kin long kum kita ki nongthoh sensos(enumerator) ha ki shnong ba pher ba pher.Don ruh kiba la shah thung kum ki Block Level Officer(BLO) khnang ba kin peit ia ki kam Thoh kyrteng elektoral rul(electoral roll) bad thoh census de.Bun ki nonghikai skul ha nongkyndong ki bunkam palat bad pynleit jongmut noh ia katei ka kam(duty) kat haduh ba ki hap ban sahngeh noh shipor ia ka kam hikai jongki ha kamra klass.Ka shimpor kumba shi bnai ar bnai ban pyndep ia katei ka kam (duty).Ki hap sahngeh shwa shipor ban leit hikai ia ki khynnah hapoh skul namar kim lah satia ban shakri ar kam ha kajuh ka por.Kane ka la ktah jur ia ka pule puthi jong ki khynnah skul bapli namar ka jingjah ki nonghikai na skul ban leit training bad leit rung bad thoh jingtip ia man la ki thliew ing.Ki skul kiba don kham duna lei ki nonghikai ki shah ktah jur bha bad ka pule ka puthi ki khynnah skul ka la dkoh lut nadong sha dong na ka daw jong ka kam Thoh Census.
Myntra ka taiew pat, ka sorkar lyngba ka tnad Municipality ka la ai hukum beit beit(order directly) ia kiba bun ki nonghikai skul ha sor ba kin khreh noh sa da ka jingleit thoh census bad ban sahngeh shwa shipor ban leit hikai bad shim klass ia ki khynnah ha kamra klass .Kim don jingsalia bad khlem da burom shuh ban iakren ne ia syllok wat ia ki Principal jong ki skul bapher bapher ruh khlem da. iaid lyngba ka Education Dept(no proper channel) hynrei ki shu ai hukum beit beit khlem da salia iano iano ruh. Kan shim por hi kumba shi bnai ar bnai ei ei ia ki Nonghikai ban jah na skul kynthup ia ka por ba ki hap ban leit training bad leit rung ing man ka thliew ing.Kane ka la buh jingeh shi katdei eh wat ia ki nongpyniaid skul ruh namar mano pat ban hikai ia ki subject bapher bapher nalor ki lynnong kiba bun, sa ka SSLC Exam ruh kan long kloi noh myntra u snem tang hapoh u bnai Nohprah(December) 2026.
Haba kumne,hangno ka Sorkar ka buh ia ka pule puthi bad ka lawei jong ki khynnah skul.Hato,ka sorkar ka la kwah ban iapein ia ka pule puthi ki khynnah bad ka kam Thoh Census?Balei ka sorkar ka kwah pyndik bad pyn dkoh ia ka pule puthi jong ki khynnah? Hato, ka sorkar ka kwah ban pynlong langknia ia ki khynnah bapli?Balei ka sorkar kam lah ban thung kam shi por(temporary appointment) ia ki khun samla kiba la nang la stad hynrei ki bym pat iohkam satia(unemployed educated youths) khnang ba kin ioh lem ka jingstad bad jingshemphang (experienced) jongki.Ban ia kaba pyllut phut ia ka pisa sorkar ha ki jingpynlut ki bym myntoi, ka bha shibun ban pyllut ia ka pisa ban ai tulop ia kine ki khynnah samla bym pat iohkam ioh jam hynrei kiba la nang la stad pat.Lada ka leh kumta,kan long shisha ka jingkyrkhu,ka jingmyntoi bad ka jingiaroh na ki paidbah baroh.
Sa da ka kam Thoh Census nion ka Sorkar ia ki Nonghikai
