Shillong: Ka seng sain pyrthei Nationalist Congress Party (NCP) ka la kynthah jur ia ka liangpyrshah ha Parliament kaba la kyntait ban pass ia ka Bill ka Constitution (131st Amendment) Bill, 2026, ban ai bhah ia ki kynthei ha ka ri.
U National Youth President jong ka NCP u Dheeraj Sharma haba kren ha Shillong ha ka sngi Saitjain ula ong ba ka jingkyntait ka liangpyrshah ban pdiang ban pass ia kane ka Bill, ka pyni ba kim kwah bad kim pdiang ban pynkup bor ia ki kynthei haka ri.
U la ong ba ka NCP ka pdiang bad kwah ban pynkup bor ia ki kynthei hynrei kito ki party kiba don ha ka liangpyrshah, ki kila kyntait ia ka burom jongki kynthei bad kila pyni iaka dur ba shisha sha ka pyrthei ha kaba ki kren leh mynleh kumba ieid bad kwah ban pynkup bor ia ki kynthei hynrei ka kam pat ka kren da kumwei pat.
Kane ka Bill ka la shah rem ha ka parliament ban ioh ar na ka lai bynta ka jingbun paid ban pynlong ain ia ka, ha kaba kiba kyrshan ki don tang 298 vote katba kiba pyrshah ki don 230 vote.
Ka jingthmu kane ka Bill ka long ban mang bhah 33 percent ia ki kynthei ban long nongthawain ha Lok Sabha bad ha dorbar thawain Assembly ha ki jylla bad Union Territories ha ka ri. Ha kane ka Bill, la tyrwa ban pynbun ia ka jingdon ki MP ha Lok Sabh na ka 543 ngut sha ka 816 ngut bad ban pynwan dur thymmai ia ki parliamentary constituency hynrei ka la shah rem noh na ka jingbym kyrshan ka liangpyrshah.
Kane ka mut ba watla ka Parliament kala pass ne mynjur ia kane ka ain, kaba la tip kum ka 106th Constitutional Amendment Act (Nari Shakti Vandan Adhiniyam, 2023), hynrei ka jingpyntreikam pat ka dang sahkut.
Shah rem ka Bill ban pynkup bor ia ki kynthei ba kyntait Ka liangpyrshah, ther ka NCP
