Shillong: U Symbud Myntri Rangbah ka jylla ba peit ia ka tnad kam pohïing u bah Prestone Tynsong ula ong ba ki paidbah barabor ki mlien ban kynnoh wut wut haba jia kano kano tang ia ka sorkar hynrei ki dei ban sngewthuh ba kum ki kmie ki kpa ruh, ka imlang sahlang ka dei ban don ka jingkitkhlieh ban tem ia ki kam bymman.
Haba iadei bad ka jingjia shah pyniap u heprit ba 7 snem na Nongrah, u bah Prestone ula ong ba katkum ka jinglap ki pulit, ka lah ban dei ka jingshah pyniap bad ka jingtohkit ka dang iaid ban thwet ban kem ia kiba donkti.
U bah Prestone ula ong ba bunsien ki briew ki kynnoh bad kdew kti beit tang ia ka sorkar ia kano kano ka kam hynrei kum briew u sngew ba ka donkam ruh ba ki kmie ki kpa kin don ka jingstad kumno ban peit ia la ki khun ki kti kumno ki leit ki wan.
U la ong ba ka kam jong ki pulit ka long ban ai ka jingshngain ia ki paidbah bad ban kynnoh ba ia ki pulit haba don kano kano ka jingjia kam dei kaba shongnia.
U la ong ba ka tnad pulit ka la thung ia ka jinggtohkit hapoh ka jingpeit u SP ka East Khasi Hills halor kane ka jingjia kaba sngewsih.
Wat ju kynnoh tang iaka sorkar, ki kmie kpa hap peit ia la ki khun: Prestone
