Shillong: Uwei u briew ula khlad bad don kiba mynsaw ruh hadien ba la mih ka jingkynad ha Lapangap, West Jaintia Hills.
Haba kren mynta sha ki lad pathai khubor, u symbud myntri rangbah ka jylla bah Prestone Tynsong ba peit ia ka tnad kam pohïing, ula iathuh ba ki Khasi ki leit ot kba sha ki lyngkha ha ka jingdon lang ki pulit hynrei hadien 3-4 kynta, la wan ka kynhun ki Karbi na Assam sha katei ka jaka bad kane ka la wanrah ka jingiahuri hura bad ka jingialeh markynti haduh ba ka la wanrah ka jingiap uwei u briew.
Katkum ka jingiathuh u Symbud myntri rangbah, uba iap u dei na ka thain Assam bad la tip kyrteng kum u Orivel Timung ba 45 snem na shnong Tapat ka Karbi Anglong.
U la ong ba ka sorkar Meghalaya kan ujor ejahar namar ba don ruh ki pulit kiba mynsaw ha kane ka jingjia.
U Symbud myntri rangbah ula ong ba ka daw ka dei namar ba katei ka jaka ka don ha ka jingiakren pynbeit pud hapdeng ka Assam bad ka Meghalaya.
Ha kajuh ka por, ula pyntip ba namar kane ka jingiakynad, na ka liang ka bor district ka West Jaintia ka la pynjari da ka korphiw ha katei ka jaka bad kumjuh na ka liang ka bor district na Assam ruh.
Ula kyntu ia ki paidbah ban long jai jai ban pynneh ia ka shongsuk shongsain na baroh ar tylli ki jylla bad ka sorkar kam shong kli kti ban pynbeit ia u pud u sam. U la ong ba ka sorkar Meghalaya ka la pyntip sha ka Assam ban leit jurip lang hynrei ka sorkar Assam kam pat jubab namar ba ki dang ia bun kam ia ka elekshon.
Katba dang ot kba ha Lapangap, mih ka jingkynad hapdeng ki Khasi bad Karbi, iap uwei,pynjari korphiw ka sorkar
