Shillong: Ban kynmaw kyrpang ïa ka sngi dap 10 snem na ka sngi khlad jong uwei na ki nongïalam ba la ïaroh tam ha Meghalaya, Hoping Stone Lyngdoh (1929–2015), u Myntri Rangbah ka Jylla Meghalaya, U Conrad K. Sangma, u la pyllait paidbah ïa ka kot ba kyrteng “Individual and History: A Biography of Hoping Stone Lyngdoh (1929–2015)” ha la ïing sah ha Shillong.
La thoh ïa kane ka kot da Dr. David Arnold Kharchandy, kaba batai bniah halor ka jingim bad ka jingïaid lynti jong u Hoping Stone Lyngdoh — uba dei u nongïalam ba la ithuh paidbah halor ka jingsngewkhia shisha ïa ka bha ka miat jong u paidbah, ka jingim ba khuid bad ka jingshakri paidbah da ka dohnud.
Haba kren, u Myntri Rangbah U Conrad K. Sangma u la ai ka jingkyrkhu kyrdoh bad jingiaroh ïa u Dr. Kharchandy halor ka jingtrei shitom ban pynmih ïa kane ka kot kaba kyntiew bad rakhe ïa ka mynsiem jong uwei na ki rangbah ba la shlur bad ba la nang ban shakri ïa ka jylla. U la ong ruh ba kane ka kot ka long ka jingnoh synniang ba kordor sha ka histori jong ka jylla Meghalaya.
Ka kot “Individual and History” ka ai ka jingwad bniah halor ka jingïaid lynti politiki jong u Hoping Stone Lyngdoh, ki kam synshar ba u bat bad ka por ha kaba u im. Ka long ka jingmyntoi kaba khraw ïa ki stad wad bniah, ki samla pule bad ki paidbah ba kwah ban sngewthuh shaphang ka synshar paidbah ha Meghalaya.
Ka jingim u bah Hoping, pyllait u Myntri Rangbah u Conrad K. Sangma
