Shillong: Ka jingtih ia ka surok 4 Lane High Speed Corridor ne Greenfield Access Control Road kaba 166.80 km kaba hap ha ka National Highway-6, kan sdang shen hadien ba la dep ia ka jingsor jamin.
Kane ka surok kan sdang na Mawlyngkhung kaba hap ha Meghalaya shaduh Panchram kaba don hajan ka Silchar ha Assam.
Ka jingsorjamin ia kane ka surok kaba la mang da ka sorkar India ha ka jinglut kaba long T. 22,864 klur tam la iaid shaid shaid bad la khmih lynti ban pyndep hapoh mynta u snem.
U symbud myntri rangbah bah Prestone Tynsong uba peit ia ka tnad PWD ula pyntip mynta ka sngi, ba ka sorkar ka la bishar bniah ia ka jingiaid ki kam ki jam ryngkat ki ophisar ka NHIDCL bad ki bor district halor kane ka surok.
Katkum ka jingong u bah Prestone ka jingsor jamin ka la jan dep artad ha Ri Bhoi, East Khasi Hills bad kumjuh ha West Jaintia Hills.
Hynrei ka kham jwat ha ka thain East Jaintia Hills na ka jinglong ki lum ki wah bad ka jingther u slap por lyiur ha kaba ki karikor ki hap ban iaid haduh 2-3 kynta da ka kjat.
Na ka 166.80 km ka jingjrong ka surok, haduh 144.80 km ka hap ha jylla Meghalaya katba 22 km ka hap ha Assam bad kane ka surok kan long kaba kongsan ban pyniasoh ia ki jylla ha ka North East.
Ha kawei ka liang, u bah Prestone ula pyntip ba ka bynta ne package 1,2,4 bad 5 jong ka surok Shillong Dawki ka la iaid shaid shaid bad la bthah ia ka NHIDCL ban pyndep noh shwa ia ka Package 1 ha u Nohprah.
Ka jingtrei ia ka package 2,4 bad 5 ka la iaid wut wut bad la khmih lynti ban pyndep ha u Nohprah 2026.
Lah jan ioh tih ia ka surok 4 Lane ba 166.80 km na Mawlyngkhung sha Panchram | Ha u 2026 yn dep ia ka Shillong-Pynursla-Dawki: Prestone
