SHILLONG: Da ki spah ngut ki nongialam bad ki nongbud jong u MLA barim ka Mawsynram, u Bah Himalaya M Shangpliang hynne ka sngi Ba-ar ki la pyniasoh ialade sha ka seng National People’s Party ha Mawsynram.
Ia kine ki nongialam kiba la mih noh na ka seng BJP ha ka 6 tarik mynta u bnai la pdiang sngewbha da u president ka NPP Mawsynram Block, u Bah Alvin K Sawkmie ryngkat kiwei ki nongialam ka NPP kiba la wan poi na Shillong ha kaba la don lang ruh u Bah HM Shangpliang.
Ha ka election MLA mynta u snem u bah Hima bad u Bah Alvin ki la iakhun pyrshah, bad haba kren ha kane ka jingialang pdiang burom ia ki dkhot ba thymmai, na ka liang u Bah Hima u la ong ba kan long ka jingsah kynmaw ba ki ar ngut ki nongialam ha Mawsynran ki la ialong kawei noh.
Na ka liang u bah Hima ha kane ka sngi u la ïaroh ruh ia ka Sorkar MDA bad khamtam ia ki 3 ngut ki nongialam ka NPP, u Conrad Sangma, u Bah Prestone Tynsong bad u Bah Sngiawbhalang Dhar kiba la pynurlong ia ki kam pynroi bapher bapher, bad kane ka la pynkhih ia u ban phai sha ka NPP.
U la ong ba watla ha ka por ba u dang long MLA u don ha ka Liang Pyrshah bad u jut her ia ka Sorkar hapoh ïingdorbar, hynrei kitei ki nongialam hapoh ka Sorkar MDA kim shym la khein, pynban ki kloiu ban pynpoi ia ki kam pynroi sha Mawsynram da kaba ai ia ka surok kaba kot haduh T.4 klur.
Na ka liang u bah Alvin haba kren ha kane ka jingialang u la pynpaw ia ka jingkmen ban pdiang sngewbha ia ki dkhot ba thymmai ka NPP, khamtam ia u bah HM Shangpliang uba dei uwei u nongialam ba la rangbah jong ka thaiun ban don ha kajuh ka seng.
Hadien kane ka jingleit pyniasoh jong ki nongialam ka NPP ha Mawsynram, lashai ka sngi ka 13 tarik Nailur, u bah Himalaya M Shangplaing un rung pura noh sha ka NPP ha ka jingialang ka yn don lang ruh da u national president bad kiwei ki nongialam ba hakhmat ka NPP ha Shillong.
Put turoi u bah Himalaya ia ka NPP, phet BJP palat spah ngut ha Mawsynram
