SHILLONG: U Symbud Myntri Rangbah ka Jylla uba khmih ia ka tnat Home (Police), u Bah Prestone Tynsong u la pynksan ia ka jingleh ki pulit ban bom ia ki briew ha ka por ba don ka jingiakhih pyrshah, ha kaba u la kynnoh ba ki paidbah ruh ki khyrwit ia ki pulit.
Lah ban pynkynmaw ba ha ka 24 tarik jong u Nailar mynta u snem ka la mih ka jingpyrshah jong ki paidbah ia ka jingsngap paidbah jong ka Meghalaya Cement Limited (MCL) na ka bynta ban pyniar ia ka jingkhlong bad pynmih mawshun jong ka kompani Topcem ha ka shnong Thangskai, East Jaintia Hills District. Ha kane ka jingiakhih la iohi ruh ha ki dur khih lane ki video ba ki pulit kila khyrwit lathi wat ia ki longkmie.
Halor kane na ka liang ka Meghalaya Human Rights Commission (MHRC) ka la shim kam hadien ba ka ioh ia ka jingujor na uwei u Bah Joannes JTL Lamare, bad ka MHRC ka la bthah ia u Director General of Police (DGP) ban thung ia ka jingtohkit ban khlieh da u heh pulit uba hap ha ka kyrdan Deputy Inspector General of Police, bad ia ka kaiphot la bthah ban pyndep hapoh 15 sngi.
Haba kren sha ki lad pathai khubor hynne ka Lah Sngi U Blei ka 4 tarik Nailur, u Bah Prestone u la pynksan da kaba ong ba ym dei ban ong tangba shah bom ki paidbah ha ki pulit, dei ban peit ruh ba ki pulit ki shah khyrwit ha ki paidbah.
U la ong ba katkum ka riti synshar ka Sorkar ka ai ka lad ban iakhih, namar ka don ka hok ban iakhih bad pyrshah, hynrei kadei ban long da ka lynti kaba dei.
Ym dei ba shah bom ki paidbah, hynrei ki pulit ruh ki shah khyrwit, ong u bah Prestone
