SHILLONG: Ki dkhot ka Hynniewtrep Integrated Territorial Organization (HITO) hynne ka sngi kila tur sha Sardar Police Station ban jubab halor ka jingshah khot hajir ki nongialam ka seng halor ka jingshah kynnoh ba kila pynkhein ia ka kyndon Section 171 CrPc.
Ha kane ka jingiaid paidbah kaba la sdang naduh jaka iengkali Tourist kaba don marpyrshah ka SBI Main Branch ki dkhot ka HITO kila iaid lyngba ka Khyndai Lad.
Ha kane ka jingiaid kjat ki dkhot ka HITO kila phah khang ruh iaki dukan jong ki bar jylla kiba don ha shi lynter ka Khyndai Lad haduh marjan ka Sardar Police station.
Kham hadien ba la wan phai na Sardar Police Station, ki dkhot ka HITO, kila iaid paidbah ryngkat ki plakad ban leit bret sha Secretariat hynrei ynda kila poi ha Kashari, kila shah khang noh ha ki pulit namar ba katkum ka 144 CrPC, la mana ban ialum paidbah hapoh 200 metre ka jingjngai na Secretariat, bad na Raj Bhavan, bad dei hangne ba ka jingiapyni ka la mih hapdeng ki dkhot ka HITO bad ki pulit, haduh ba ki pulit kila pyndonkam ban kawang bom sat khmat bad ban tied lathi ia ki dkhot ka HITO, kiba la pra laki laka shane shatai.
Kawei ka dukan kaba don mar pyrshah ka State Bank, ka la shah kawang bom sat khmat hadien ba ki dkhot ka HITO kila leit rieh ha katei ka dukan.
Na ka liang, u Superintendent of Police u bah Sylvester Nongtnger ha ka kyrwoh u la ong ba ki don 3 ngut ki pulit kiba mynsaw na ka jingiapyni bor bad ki dkhot ka HITO bad uwei u majistor, ha kaba ula kam, ba ka la don ka jingkawang maw na ki dkhot ka HITO.
Ha kane ka jingjia, 10 ngut ki dkhot ka HITO kila shah rah ha ki pulit.
Mynsaw 3 ngut ki pulit, u majistor, shah rah 10 ngut ki dkhot ka HITO
