SHILLONG: Ka Myntri ba khmih ia ka tnat Aiñ ha ka Jylla, ka Dr Mazel Ampareen Lyngdoh ka la ong ba ka Inner Line Permit (ILP) kadei ka kam jong ka Sorkar India bad na ka bynta ban pyntreikam ia ka ILP donkam ban ioh ia ka jingmynjur na ka Sorkar pdeng.
Haba kylli halor ka jingkren jong u Bah Prestone sha ki nongialam ka HYC, ba ka kynhun Myntri kan leit sha Delhi ban buddien ia ka jingdawa ILP, na ka liang ka Dr Ampareen kaba dei ruh ka nongaiktien jong ka Sorkar MDA-II, ka la ong ba ia kane yn dang hap ban ap ia ka jingpynsngew jong u Myntri Rangbah uba don mynta ha Delhi ban iakren ia kane ka kam.
Ha kajuh ka por ka Myntri ka la ong ba ka Sorkar kam kwah ban pynsahteng sah ia kane ka kam, bad ki paidbah kim dei ban sngew ba ka Sorkar ka la shu pynpjah ia kane ka kam, bad ki paidbah ki hap ban tip ia ka jingshisha ba ha ka synshar ar Sorkar ki don shibun ki kyndon ba hap ban bud.
Ha kaba iadei bad ka jingdawa ban ithuh noh ia ka ktien Khasi hapoh ka Khyrnit kaba Phra jong ka Riti Synshar, ka Kong Ampareen ka la ong ba ka donkam ka jingiatreilang, namar ba kumba ka long mynta kiba bun kiwei ki jylla ki dang ap ha u lain ban ioh jingithuh ia ka ktien ka jong ki.
Ha kaba iadei bad ka jingpynpaw jong ka Khasi Authors’ Society (KAS) ba ka Sorkar kam shim khia satia ia kane ka kam, ka Myntri ka la ong ba kam iahap ban kynnoh ba ka Sorkar ka khlem shim khia. Ka la ong shuh shuh ba ka KAS kam lah ban leh hi ne leit iakren hi halor kane ka phang sha Delhi, pynban ka KAS ka la dei ban ai ka jingiatreilang bad ka Sorkar.
Ka sorkar jylla kam don bor halor ka ILP, ka shong ha ka Sorkar Pdeng
