SHILLONG: Ka kynhun niam Balang Katholik, Meghalaya ka la thoh shithi sha ka National Law Commission ban pyrshah jur ia ka jingthmu ka sorkar India ban pyntreikam ia ka Uniform Civil Code (UCC) kaban khynra naphang ia ki jingngeit niam jong u briew ha kane ka ri India.
Ha ka shithi kaba la phah sha u Member Secretary ka National Law Commission, u Rev. Victor Lyngdoh, Archbishop Shillong, u Rev. Jose Chirackal Auxiliary Bishop, Tura, Rev. Wilbert Marwein, Bishop ka Nongstoin bad Rev. Ferdinand Dkhar, Bishop Elect ka Jowai, kila pynpaw ba ka ain ba iadei bad ka jingim shimet u briew ka tuid na ki riti dustur bad ki rukom leh rukom im kiba iadei bad ka jingngeit niam bad ym lah ban pynsniew dur noh ia ka, da kaba wanrah ia ka UCC. Kila pynpaw ka jingpyrshah jur ban wanrah ia ka rukom jingngeit tang ha kawei ka niam lyngba ka UCC kaba long pyrshah ia ka artikil 25 ka riti synshar ka ri.
Kila bynrap ba ka artikil 341, 342, bad ka Sixth Schedule kila pynkup bor ia ki riewlum hynrei ka jingthmu ban wanrah ia ka UCC kan pynjot naphang ia kine ki seng nongrim. Kumjuh ka Law Commission kaba 21 ha u 2018, ka la pynpaw ba ka UCC kam dei kaba donkam ne kaba la kwah ha kane ka por hynrei ka jingkylli, ka long kaei ka jingsngew donkam kyrkieh ka sorkar India halor kane. Kine ki rangbah niam kila kyntu ia ka sorkar India ba ka dei ban sangeh ia ka jingthmu ban pyntreikam ia ka UCC.
Ka UCC kan khynra naphang ia ki jingngeit, pyrshah jur ka Balang Katholik
