SHILLONG 13, Naitung: Ka sorkar jylla ka hap ban pyndem noh toin ha ki nongniah taksi kamai ia ka jingpynjari Odd bad Even Number hadien ba ka la mih ka jingiakhih bad ka jingpyrshah jur na ki nongniah taksi kamai ha ka nongbah.
Ha ka jingshisha, ka Deputy Commissioner ka la pynjari Odd bad Even Number na Kashari, Khyndai Lad bad Motphran ia ki taksi kamai kum shi bynta ban pynduna ia ka jingsahkut kali ha ka nongbah hynrei mynta ka sngi, ki nongniah taksi kamai kila ieng lain syndon sbak ha surok ha Civil Hospital Shillong haduh ba ka la sahkut kali jur bad kane ka la don ruh ka jingiapyni nia hapdeng ki nongniah taksi bad ki pulit. Khadduh ka DC ka hap ban khot iakren ia ki ban pynbeit ia kane ka jingeh.
Haba pyntip ia ka rai ka sorkar halor kane, u symbud myntri rangbah uba peit ia ka tnad kam pohiing u bah Prestone Tynsong u la ong ba ka jingpyntreikam ia ki Odd and Even number, ka Sorkar ka la rai ban pynsangeh noh shwa bad ka Sorkar kan sa bishar biang kumno ban leh na ka bynta ka bit ka biang lang ia baroh ki nongshong shnong.
Na ka liang u President ka East Khasi Hills Local Taxi Welfare Association, u bah Wandonbok Jyrwa u la pynbna ba ka DC ka la shim ia ka rai ryngkat u SP ban weng noh ia ka jingiaid Odd bad Even number naduh na Kashari shaduh Motphran.
Ieng laiñ ki taksi kamai sbak ha surok ban pyrshah ia ka Odd bad Even Number ba pynjari ka DC
