Hana ka ong ban wanrah 10 billion dollar, ka khang pynban ia ki trai shnong, ong ka kong Angela

SHILLONG: Ka nongialam ka seng ki nongdie madan ka kong Angela Rngad ka la takrain tyngeh ia ka bor district ka east Khasi hills halor ka jingphah khang ia ki dukan baroh shwa ka 10 baje mynmiet ha nongbah Shillong.
Ha ka miet 12 tarik Naitung 2023, ka kong Angela ka la ong ba ka sorkar ka ong ba kam lah ban khang ia ka jingtih dewiong beain, bad mynta ka pyni bor sa ia I kam barit jong ki nongdie madan bad kane ka dei ka jingthom bor ia ka hok ban kamai jakpoh.
“Ia ki kam beaiñ shisha, kum ka jingtuh, ka jingtih beain ia u dewiong, ki ong kim lah leh eiei, ia ine I iam barit ki wan ban pyni bor, ngi la sngewthuh ka dei ka sorkar kaba long kumno”, la ong ka kong Angela.
Ka la ong ba kita ki kam beain wat ha ka por ba shai, wat ha por leit trei ophis ruh ki bun bha ki kam beain, bad ka sorkar ka dei ban peit shwa ia ki kam tuh ia ki hok jong ki paidbah. Lada don kita ki kam runar, ka lad kam dei ban shu khang dam hynrei ka dei ban pynkhlain ia ka rukom pahara, ban lum ban lang ia ki samla, ban plie shuh ia ki lad ia ki briew ban ioh ban lehkmen leh risa ha ka rukom kaba kmen bad kaba shai.

“Ka jingkhang dam ka dei ka jingknieh ia ki hok jong kiba kamai man ka sngi hynrei ka donkam ka jingshemphang ban wanrah ia ka jingbha jingmiat ia baroh”, ka la ong, bad bynrap, “Ngi la iakhun ban ioh ia ka hok jong ki nongdie madan, la 7 snem bad haduh mynta kim pat lah ban shna ia ki rule. Ki paidbah ki dei ban sngewthuh ka sorkar kaba kumno”.
Mynta ka sngi, ka seng Meghalaya and Greater Shillong Progressive Hawkers and Street Vendors Association hapoh ka jingialam ka President ka kong Violin Pyrtuh kila ai jingthoh sha ka Municipal bad ka Deputy Commissioner ban pyrshah jur ia kane ka hukum ban khang dukan tang hapoh 10 baje janmiet.
“Ym dei ban pdiang ia kum kane ka jingleh donbor jong ka sorkar bad ki nongshong shnong ki dei ban iamih paidbah palat ia ka 10 baje janmiet ban kamai da ka jingsngew shngain namar ba kane ka dei ka jingsdang ban thombor ia ki paidbah. Lada leh kumne ban shu khang, kan nang bun shuh ki kam runar pynban”, ka la ong.
“Baroh kawei ka ri India bad ka pyrthei bun kiba la wan shna video khnang ba kumno ka jingdie marbam ha Shillong ka long kaba itynnad”, ka la ong ka kong Angela.
Ka la ther ia ka sorkar da kaba ong, ‘sorkar ka ong ban wanrah ia ka ioh ka kot kaba 10 billion dollar ban khring ia ki nongwankai hynrei ha kawei ka liang ka khang dam ia ngi ki nongshong shnong bad la iohi ia ka jinglong arsap jong ka sorkar’.