SHILLONG: Ka jingpyrkhing ka Deputy Commissioner ka East Khasi Hills ban khang dukan hapoh 10baje mynmiet ka pyndiaw jur ia ki nongdie madan. Haba kren mynta ka janmiet, ki nongdie madan kila ong ba ki nongiaid nongieng bad kiba wan donkam nabar mynmiet ki shngain namar ba ki don ki nongdie jingbam mynmiet.
Ha ka miet 12 tarik Naitung 2023, ka la don ruh ka jingiapyni nia hapdeng ki nongdie madan bad ki pulit kiba la wan ha ka por 10 baje mynmiet ban beh noh ia ki hadien ba ka DC ka la phah ia baroh ki dukan ha sor Shillong. Hynrei hadien ba ka la don ka jingiania, ki pulit kim shym la kyndang eiei bad kila pynjem noh watla kiba bun kiba die jingdie kila lum noh ia ki tum ki tam ban phet noh. La iohi ba ka Khyndai Lad ka kynjah bha hadien ba ki nongdie madan ki phet noh bad ki briew kiba iaid ba ieng ruh bun kiba la phet lut.
Kine ki nongdie jingbam kila kyntu ia ka DC ba kan ailad haduh 12 baje mynmiet namar ba hapoh 10 baje mynmiet ka dang kloi than namar ba ka iew ka dang sdang naduh 10 haduh 12 baje mynmiet bad kila ong ba ki pulit ki dei ban don ban peitngor. Ha kajuh ka por kila kam ba ki pulit lei man ka sngi ki ju wan ban beh haduh ba hap ban iapyni nia beit man ka por.
“Ki nongleit nongwan mynmiet ki shngain ba don ma ngi ba die jingbam, kiba thngan, kiba wan donkam khamtam kiba leit sha jaka sumar”, la ong kawei ka nongdie jingbam ha Khyndai Lad.
Ki la ong ba ki wan ban kamai hok ym ba die drok ne leh ia ki kam khlem akor bad lada ka sorkar ka khang ban kamai hok, ka mut ka sorkar ka kwah ba ki briew kin leh ia ki kam bymman.
Haba kyntu ba ka DC kan ailad haduh 12 baje da miet, kila ong ba ka iew jongki ka jus dang naduh 10 baje janmiet haduh 12 baje mynmiet. “Ngim tip ia kata ka jingjia sha Laitumkhrah hynrei ngi kyntu ia ka sorkar ba kan ailad haduh 12 baje da miet namar ba ngi die jingbam ban bsa ia ka iing ka sem la bun snem mynta”, ki la ong.
Lah ban kdew ba ka DC ka East Khasi Hills ka la pyrkhing ban plie dukan palat ia ka 10 baje mynmiet shi bynta ban iada na ka jingsniew kiba lah ban mih na ki riew shim kabu khamtam hadien ba la mih ka jingjia ha thain Laitumkhrah ha kane ka taiew.
Khlem ki nongdie madan mynmiet, long ngiw ngiw ka Khyndai Lad
