SHILLONG: Ka kynhun na North Goa Zila Panchayat kala wan wad kynduh ia ki nongialam ka Khasi Hills Autonomous District Council (KHADC) hapoh ka jingialam u chairman u Sieddesh bad u Chief Executive Officer (CEO) u Ajay Gause, katba na ka KHADC la ialam u Chief Executive Member u bah Pyniaid Sing Syiem ha kaba kila iaphylliew jingmut ha kamra ka KHADC.
Kila iaphylliew bad iasam ia ki jingtip hapdeng jongki. U Siddesh ula iathuh ba ka jingthmu jongki ban wan jngoh ia ka KHADC ka long ban lum jingtip ia ka rukom treikam jongki bad kumno ban kit sha Goa ban pynbha ia ka rukom treikam kiba iahap.
U CEO u Ajay Gause u la iathuh ba ka don ka jingiapher ka rukom treikam hapdeng ka Zila Panchayat bad ka District Council namar ba hangne ia ki kam pynroi la pyntrei ka District Council katba ha Zila Panchayat la pyntreikam lyngba u CEO ba la thung ka sorkar jylla.
“Ka jingiapher hapdeng ka Goa bad ka Meghalaya. Ia ka Goa la tip kum u shyiap, ka duriaw katba ia ka Meghalaya la tip na bynta ka jingitynnad ki khlaw ba rben, bad ki jinglong ka riti dustur”, la ong u Ajay.
Na ka liang u bah Pyniaid u la iathuh ba ka Council ka la iasam jingtip sha kane ka kynhun na Goa halor ka riti dustur bad ki rukom treikam ka Council.
“Ka jingwan kane ka kynhun na Goa ka long ban tip kham bniah ia ka rukom pyniaid kam ha District Council bad kiei ki kam ba ka peit ia ka synshar khadar, ka it ka Hima bad riti dustur”, la ong u bah Pyniaid.
Ka Goa ka jaka u shyiap, ka duriaw, ka Meghalaya ka jylla ba riew spah ha ki khlaw bad riti dustur
