SHILLONG: Ka Deputy Commissioner ka East Khasi Hills ka la ong ba hadien ka 10 baje mynmiet ka la dei ban poi sha ïing sha sem, ym ban shang makia namar ba kam long kaba shngain ha sor Shilong haduh ba ka la hap ban pynjajari da ka kyndon 144 CrPC ban pyrkhing baroh ki dukan.
Haba kren mynta ka sngi, ka DC ka Kong Rosette M Kurbah ka la ong ba namar ka jingdon ki riew shim kabu ban pynthut ia ka shong shngain kam banse ban pynjari da ka kyndon 144 Cr.PC kaban treikam naduh ka 12 tarik haduh ban pynbna da kumwei pat, ban mana ba baroh ki dukan kim dei ban plie palat ia ka 10 baje mynmiet.
“Ki don shibun jingjia huri hura ha Shillong, la iohi ba ki briew kila iaid da ka kali, ki tem jingrwai ba jam, da kaba pynkylla ia ka tyndong pynmih tdem bad ka pynmih jingsawa bad kane ka la wanrah ka jingsngew tieng ia ki briew ban mih ban iaid sha lynti syngkieng bad na kane ka daw, ngi hap ban shim ia kane ka rai”, la ong ka kong Rosette.
Ka la bynrap, “hadien 10 baje mynmiet, nga sngew ba ki briew ki dei ban leit phai sha la ïing ban iadon ha iing ha sem, ngi dei ban don u pud ban shah ban plie ia ki briew ban plie dukan palat ia ka 10 baje mynmiet namar ba kam long kaba sngew shngain”,.
Ka la ong ba kam dei kaba suk ban don ki pulit ha man ki jaka ha Shillong. “Kam long kaba suki ban buh pulit ha man ki jaka ka Shillong watla ka long kaba suki a ki briew ban ong kumta, hynrei ngi hap ban wad ia ka daw, balei ki briew ki mih, ka lah ban dei ka jingshim kabu ban mih shabar ynda la miet. Kane ka kyndon kan don haduh ban wan phai biang ka jinglong jinglong kaba jai”, ka la ong.
10 baje mynmiet la dei ban poi sha la ïing, ong ka DC
