SHILLONG 11, Naitung: Mynta ka janmiet ha ka por 7:15 pm eiei, uwei u briew ula shah kem halor ka jingkynnoh ba ther maw ia ka ïing sah ka myntri sorkar ka kong Ampareen Lyngdoh ha Laitumkhrah.
U SP ka East Khasi Hills u bah Sylvester Nongtnger ula iathuh ba ia une u briew la ioh bat ki trai ing kiba la iohi shynna na ka CCCTV hadien ba ula kawang 4 tylli ki maw. La kurup ruh ia ka wait bnoh.
U SP uba la mareh bran bran sha katei ka jaka, ula ong ba la kem ia une u briew bad dang eksamin la u dei uba biang khlieh ne em bad ym pat tip lada don ne em kiwei ruh.
Katkum ka jingiathuh u lok ka kong Ampareen u bah Fantin Lakadong, une uba shah kem u dei ba sah ha Malki.
Haba kren bad ka kong Ampareen Lyngdoh, ka la iathuh ba une u briew uba wan hiar thma ia ka ïing ula shah bat noh ha u lok jongka, u bah Fantink Lakadong katba u dang wan tur hadien ba la ther maw ia ka ïing mynta ka janmiet.
Ka kong Ampareen ka la iathuh ba katba ka dang iashong jingialang bad ki nongrep da ka online, ka la ioh sngew jrain kumba pait ne hap aiu, sa shiphang, phai ruh ym phai, la riew biang jrain bad sa shiphang jrain biang na jaka ba don jingkhang it.
Hamar kane ka por, ka la mareh ban iakren ia u lok bad kila mih sha madan bad kila iohi ba u briew ula rah da ka wait bnoh ruh.
Kane ka jingjia ka la pynkyndit thret haduh ba mih lut ki nongshong shnong. Ka la ong ba kum ka nongialam paidbah, kaba donkam ban kren ka kren.
Ka la iathuh ba une u briew, ha ka por elekshon ruh ula wan hiar thma ia ka hynrei kam shym la don ka jingbuh nud.
Ha kajuh ka por, u lok jongka, u bah Fantin Lakadong ula ong ba lada um kloi ban iohi ia ka wait ba u bat, kan long ka jingmynsaw ia u shwa ba un ioh bat ia u.
Ka kong Ampareen ka la ai nguh ia ka dorbar shnong, kiba la wan ai jingiarap bad ka kyrpad ia ki nongkyrshan ban long kiba jai jai.
Wan lun maw biang uba la pyrshang hiar thma teng ha ka por elekshon ia ka kong Ampareen
