SHILLONG 10, Naitung: Hadien ba ka Seng Ri War Development Organization ka la ioh ia ki jingujor na ki nongshong shnong ka thaiñ Nongjri bad Tishang halor ka jingwan rung tuh ki khar bangla sha ki bri ki bsah kiba don ha kine ki thaiñ khappud India bad Bangladesh kiba hap ha Nongjri Tishang Pungdiengïong manla ki por ban pom tuh ia ki dieng ki siej, ki dieng kwai, bad kiwei kiwei pat ki mar rep, bad ban dusmon ia ka rep ka riang ha kine ki thaiñ bad kaba kham sngew shyrkhei eh ka long ba kine ki khar bangla ki ju byrngem ruh wat iaki nongtrei bri ban pom da ka wait lada ki pyneh bad beh iaki.
Kumta halor kitei ki jingud jingnam jong ki paradoh parasnam ka Seng mar mar ka la leit iakynduh iaki heh BSF kiba dei peit ha kitei ki thaiñ haka 08 tarik /07/2023 por 12 baje shiteng sngi, ka meeting ka long kaba seisoh namar ki BSF ruh kila ai ka jingmynjur ba yn ia trei lang ryngkat ryngkat bad ki nongshong shnong ryngkat ka Seng naka bynta ban wanrah iaka shong shngaiñ ha katei thaiñ bad ban teh pyrkhing bha ia kane ka jingioh lad ki khar bangla ban wan rung tuh shapoh u pud u sam ka Ri India.
Hadien ka meeting ynda la mih noh na office treikam ki BSF ngi iaid lynti lymba ka Surok border fencing ban leit phai ing noh, hynrei donbok ba ngi iohi ia ki khar bangla ba ki mut ban rung tuh sha u pud u sam kane ka Shnong Tishang Nongjri lymba ki thliew muri badon jingkieng (culvert) bad ngi la pyntip noh sha ar ngut ki BSF kiba don hajan kane ka jingkieng khnang ba kin peit pyrman bha ia kine khar bangla ba kim dei ban ïoh rung sha u pud u sam kane ka Ri Khasi, ynda ngi la iakren bad kine ki BSF ki iathuh ha ngi ba ki don ki khar bangla kiba tuh dieng bad pom dieng sha pdeng khlaw ka bri Tishang Pungdiengïong, kumta mar mar ki dkhot ka Seng kila leit wad bad rung sha pdeng khlaw bad kila ioh kem noh ia lai ngut ki khar bangla kiba pom tuh iaki dieng kwai, dieng met kiba ki la thmu ban pynkie lymba ki wah kiba tuid sha Bangladesh. Ryngkat ka jingiatrei lang bad ki shipai BSF la ioh ban kem noh iaki bad la kurup noh ia kine ki dieng, la ioh ruh ban kurup ia ki lai tylli ki wait na kti jong kine ki khar bangla bad la aiti noh iakine ki lai ngut ki khar bangla sha ki bor Pulit daki shipai BSF ha ryngkat ka jingdon lang ki dhot ka Seng naka bynta ba kin leh ia kiba donkam halor kane ka jingwan rung tuh ki tei ki lai ngut.
Ka Seng kala phah ruh ia ka kyrwoh sha ka sorkar kmie lymba ki shipai BSF ba ka sorkar kan pyndep noh kham kloi ia ki jingker sainar shiah bad ruh ban buh noh da ki CCTV camera haki thaiñ khappud khnang ba yn lah ban teh lakam iaka jingwan rung tuh ki khar bangla sha u pud u sam ka Ri India.
Kumta ka Seng ka ai khublei ia ki shipai BSF, ki Pulit, ki ba la shimkhia kloi kloi ban kem noh ia kine ki lai ngut ki khar bangla kiba wan ban tuh ban thiem ia ki jingdon jingem kiba don ha ki bri ki bsah jong ki nongshong shnong kane ka thaiñ. La ong ka kyrwoh na u bah Bah Tensing Khonglah u President RWDO bad u Bah Donlang Nongbri u General Secretary RWDO
Shah kem ki Khar Bangladesh ba rung tuh na Muri sha India ha thain Nongjri
