SHILLONG 09, Naitung: Ka kam President ka seng United Democratic Party (UDP) ka lah ban leit biang sha u bah Metbah Lyngdoh jong kane ka samoi lai snem ban wan. Katkum ka jingtip kaba la ioh lum, kiwei kiwei ki nongialam kim pat nud ban ia aireng ia kane ka kam namar ba bun kiba dang kwah ban pynneh biang ban ailad ia u bah Metbah ba un ialam biang ha kane ka samoi.
Ha ka jingshisha, u Bah Paul Lyngdoh u dei uwei na ki nongialam uba la ju iakhun teng ia kane ka kam ha u snem 2019 hynrei la sngewthuh ba u shaniah beit ha ka jingstad jong ka Nomination Committee, la ka ibit ne em ban pynrung kum uwei na ki kyrtong ban iakhun ia kane ka shuki.
Ka UDP kan jied biang ia ki nongkitkam baroh jong ka samoi 2023-2026 ha ka 29 tarik Naitung 2023. Bad katkum ka rukom, ia ki kyrtong ban iakhun ia ka elekshon nongkitkam ka parti, la bynshet ha ka Nomination Committee ba kan tyrwa pat sha ka general council ban jied.
Katkum ka khubor ba la ioh na ki nongialam ka party ba hajrong, la sngewthuh ba u bah Metbah u lah ban ialam biang ia ka party watla ym pat ban tip.
Dang shen, u General Secretary ka UDP u Dr. Jemino Mawthoh ula ong ba ka UDP ha ka jingialang jong ka Central Executive Committee dang shen, ka la jied ia ka kynhun ban don ha ka Nomination Committee na bynta ban pynkhreh ban jied ia u nongialam u President jong ka party.
U Dr. Jemino u la ong ba ka rukom jied President ha ka UDP ka kam pher ha kaba kim dei ba leh da kaba shu jied paidbah hynrei la thung da ka Nomination Committee.
Ha ka Nomination Committee ki don lut ki nongialam jong ka UDP kynthup naduh ki President bad Secretary jong ka District ha kane ka jylla bad ka Nomination Committee kan sa jied mano ba long Chairman jong ka Committee ban pyniaid bad kin sa jied ia ki nongkitkam bad kine kin sa ai jingmut iano ban jied iano. Hadien ba ka Nomination ka la jied ia ki, kan tyrwa ia ki kyrteng bad yn sa rah sha ka General Council bad kin sa mih ka kyrteng na ka Nomination Committee bad lada la hun ka mut ka la biang bad lada kim hun kin sa iaid da kawei.
Lah ban leit suk ka kam President ka UDP sha u bah Metbah
