SHILLONG 24, Jymmang: Ka jingiakren pynbeit pud hapdeng ka jylla Meghalaya bad ka jylla Assam jong ka kylla kaba ar na bynta 6 tylli ba dang sah, kan sdang shen ha u bnai Jylliew ban wan.
Ia kane la shim ka jingialang jong ar ngut ki myntri rangbah, u Conrad K Sangma bad u Himanta Biswa Sarma ha ka jingialang kaba long ha Guwahati mynta ka sngi ha kaba la don lang ruh kiwei Myntri jong baroh 2 Jylla bad ki Chief Secretary.
Ki 6 tylli ki jaka ba dang sah ban pynbeit ki kynthup ia ka Langpih, Bordwar Nongwah Mawtamur, Deshdemoria, Khanduli, Psiar, Block I bad Block II.
U Myntri Rangbah ka Jylla Meghalaya, u Conrad K Sangma u la ong ba ka jingialang ka la bthah ia ki Regional Committee ban lum ia ki jingtip bad ban sngap ia ka jingkwah ki paidbah da kaba phah pat ia ka kaiphot sha ka Sorkar ka ban sa iakynduh biang ha u Naitung mynta u snem.
U la pyntip ba ki ar ngut ki Myntri Rangbah kin leit ruh sha kito ki jaka ba iakajia khamtam ha khappud jong ka Karbi Anglong, Assam bad West Jaintia Hills, Meghalaya.
Ki 6 tylli ki jaka ha khappud ba la iakren ha ka kylla kaba ar ki long kiba shitom ban pynbeit, hynrei u la pynpaw ba ka jingkyrmen ka don namar lada don ka mon ka lynti ruh ka don ban weng noh ia ki jingeh ha khappud.
Katba na ka liang, u Myntri Rangbah ka Assam, u Dr Himanta Biswa Sarma u la ong ba ha ka jingialang la rai ba yn iakynduh biang ha u Naitung, hadien ba la ioh ia ka kaiphot na ki regional committee.
U la ong ba ka Langpih, Khanduli, Block 1 bad Block 2 ki long shisha ki khappud kiba eh ban pynbeit, hynrei u la pynpaw ba yn lah pat ban pynbeit ia ki khappud. Haba kylli, na ka liang u Himanta u la ong ba ka jingialang ka khlem buh por haduh lano ban pyndep ia kane ka kam, namar ba yn nym leh kyrkieh satia.
Lah ban pynkynmaw ba ki 6 tylli ki jaka ba iakajia pud hapdeng ka Meghalaya bad Assam la dep ban soi ia ka soskular lane ka Memorandum of Understanding (MoU) ha u Lber jong u snem 2022. Kine ki jaka ki kynthup ia ka Hahim, Gizang, Tarabari, Boklapara, Khanapara-Pilingkata bad Ratacherra.