Shillong: Ka shnong Umling, Ri- Bhoi district kam don kano kano ka jingpyrshah ia ka jingwan buh ia ka Facilitation Centre bad kumjuh ia ka Food Court bad ka pdiang sngewbha ia kane ka projek khnang ba kan long ka jingmyntoi ia ka shnong, ki samla bad ki trai jylla.
Ha ka jingiakren bad u secretary ka shnong Umling u bah Beningroy Lapang ula ong ba ka shnong ka la don ka jingiakut bad ka sorkar ba kan ai kam ai jam khamtam ia ki khynnah ka shnong kiba lah ban trei kiba na ka shnong bad ki para Khasi haba ka wanrah ia katei ka khyrdop shim kyrteng bad ka rynsan bam ne Food Court.
U bah Beningroy ula ong ba kane kan long ka jingmyntoi ym tang ia ka shnong ka thaw, hynrei ia ka jylla hi baroh kawei.
Ula ong ba ka sorkar ka la iakren bad ka shnong halor ka jingbuh ia ka Food Court, watla kam ong eiei halor ka Facilitation Centre.
Katkum ka jingong u Secretary, ka shnong Umling ka don kumba 400 tnum eiei haduh mynta.