Shillong, Naitung 23: Ka Khasi Student Union (KSU) South East Central Circle lem bad ka Federation of khasi Jaintia and Garo people’ Riwar Mihngi Circle (FKJGP), ha ka sngi Palei kila pyllong ia ka jingjurip ia ka surok bah Shillong-Dawki kaba dkut harum Laitlyngkot.
Ka KSU bad ka FKJGP kala byrngem ban pyntrei hi ia katei ka surok lada ka bor ba dei peit kim leh eiei hynrei ha ka jingjurip, kila lap ba ka kompeni ka la pyntrei ban maramot ia katei ka surok kaba twa.
Ia ka KSU la ialam u President samla Wallamjingshngain Suting bad u President ka FKJGP Riwar bah Evanfield Khonglam, kila thmu ban leit shna hi noh ia katei ka Surok ha kaba kila rah ki tiar ki tar kum ki nar lyngka, ki byrsha, mohkhiew, hynrei ynda la poi hashen kila lap ba la sdang ban trei ia ka surok bad ki la sahngeh noh ban tih ia ka surok, hynrei ki la shu pyllong noh da ka jingialang kaba lyngkot, ha katei ka jaka kaba dkut ka surok.
Ha kane ka jinghiar kine ki ar seng, la sakhi ba ki pulit ki la poi lang hakatei ka jaka.
Haba kren ha kane ka jingialang, u samla W. Suting ula ong ba ki paidbah ka thain riwar Pynursla kila kordit khait ha kine ki 6 snem kynthih na ka jingshna iaka surok kaba khlem lah ban pyndep haduh mynta. Ula ong ba ha kine ki 6 snem, la don ka jingduh ia ki mynsiem bad mynta ki paidbah kila mad sa ban iap thngan na ka jingbym long shuh ka leit ka wan.
Katba u President ka FKJGP Riwar u bah Evanfield ula ong ba ka kompeni ka dei ban pynsted ban pyndep iaka surok ban ailad ban iaid shipor ki kali shwa ban pyndep ia kaba pura. Ula ong ba ka jingsniew ka surok, ka la pyllong ia ki nongkhaii ban pynkiew iaka dor ki marbam mardih ruh kaba la ktah jur ia ki paidbah ka thain.
Ula dawa ba dei ban pynkut noh ia kane ka kompeni nabar jylla bad ban ai ha ka kompeni na kane ka jylla, kum ka dhar compeni kaban kham sngewthuh ban iakren bad ki para Khasi.
Mar ia rah lyngka, mohkhiew ka KSU & FKJGP, sdang khat khyndew ki jcb ka kompeni | kham lah ka Dhar kompeni
