Shillong: U Myntri Rangbah Conrad K Sangma mynta ka sngi ula pyniaid ia ka jingialang bishar kam ha State Guest House, Taraghar, Shillong ban bishar ia ki kam ba iadei bad ka jingsam bording elektrik, ka rukom ai bill bad ka jingud jingnam jong ki nongthang bording ha ki jaka bala pyniaid da ka SAI Computers hapoh ka jingpynbeit Distribution Franchisee jong ka Meghalata Power Distribution Corporation Limited (MePDCL).
Ha kane ka jingialang la wan iashimbynta da u Chairman-cum-Managing Director, MeECL, Sanjay Goway, ki Heh Ophisar ka MePDCL, ki nongmihkhmat ka SAI Computers bad kiwei ki Ophisar kiba don bynta ha ka kam.
Ha ka jingialang, ka SAI Computers kala ai ia ka jingbatai kaba bniah halor ka jinglong jingman jong ki kam ba ka pyniaid ha ki jaka ba aiwai sha ka (franchise area), haba pynpaw ia ki jingeh kiba la ioh pateng na ki rukom pyniaid ba hashuwa, kynthup ka jingbun ki meter ki ba thut treikam, ki jingtei kiba la rim, ka jingsniew ki transformer, ki jingtan bording khlem meter, ka jingduna ha ka jingkhein ia ki nongthang boding bad ki kam ba iadei bad ka jingai bill.
Haba pynpaw ia ka jingsngewkhia halor ki jingujor u paidbah ba iadei bad ka bill boring elektrik kaba heh bad ka jingbym thikna ka jingioh bording, u Myntri Rangbah ula ban jur ba ka jingshaniah ki nongthang bording bad ka jingai jingshakri ka dei ka ban long ka ba kongsan tam.
Haba kren halor ki jingujor ba iadei bad ki jingiakren bad ki nongthang bording, u Conrad ula ban jur ia ka jingdonkam ka jingiakren da ka akor ka burom bad ki paidbah bad kyntu ia ka Franchisee ban pynkhlain ia ka jingiakren bad ka jingleit iakynduh ia ki nongthang bording.
U Myntri Rangbah ula bthah ia ka Franchisee ban leit pynlong ia ki prokram pynsngewthuh paidbah sha kylleng ki jaka bad pyniadon bynta lang ia ki nongialam jong ki thain, ki Nongmihkhmat Balang, ki Sengbhalang, ki Nonghikai bad ki kynhun bapher bapher ba kin batai ia ki jingeh bala pynbeit, ka jingpynbha bala shim bad ka por bala buh ban pyntreikam. Ula ai jingmut ruh ia ka kompani ban pan ia ka jingai jingmut u paidbah bad ban leh eiei ia ki jingeh jong ki hapoh ka por kaba biang.
U Myntri Rangbah ula kular ia baroh ki kynhun ba don bynta ba ka Sorkar Jylla kan iai bteng ban kyrshan ia ka jingkynshew ha ki jingtei pynmih bording, kynthup ki sub station, transformer, bad kiwei kiwei ki jingpynbha. Ula pynpaw ba ka Sorkar ka iai kut jingmut ban pynkhlain ia ka kam pynmih bording bad pynthikna ba ki nongthang bording ki ioh ia ka bording elektrik kaba shaniah bad kaba lah ban siew.
‘Tei ka jingshaniah bad u paidbah, ai ka jingshakri kaba kham bha’, ong u Conrad ia ka SAI
