Shillong: U trai ka bike kaba la shah tuh na jaka set ha Lumkshaid, Mawprem, Shillong ula ioh biang ia ka bike kaba la buhrieh ha khlaw ha thain Pynursla.
Kane ka jinglap jongu, ka dei namar ba u buh GPS tracker haka bike jongu, kaba la pynlah ia u ban buddien shaei kane ka bike ka don.
U bah Kedy Lyngkhoi u trai ka bike ula iathuh ba hynne ka step kumba ha ka por 3 baje mynstep ka bike jongu ML05 AG 1394 ka la jah na Mawprem Lumkshaid bad ula lap ha ka por kumba 8 baje mynstep hadien ba u la leit peit.
Kumta hi, u la leit ban ujor ejahar ha Lumdiengjri Police Station. Ha ka jingbuddien jongu, u tracker ula iathuh ba ka bike jongu ka la don thaiñ Pynursla.
Halor kane, ryngkat bad ki dkhot ka seng FKJGP, ki la hiar sha Pynursla ban wad ïa ka bike hynrei, u la kynnoh ba ki pulit ka Pynursla Police Station kim shim khia watla ula pyntip ia ki ruh wat hadien ba la ap kynta.
Kane ka la pyllong ia u bad ki dkhot ka seng ban leit wad hi ïa ka bike bad hadien ka jingkhura kaba jur ha katei ka thain ba la iathuh u tracker, ki la lap biang ïa ka bike kaba la buhrieh ha hapdeng kawei ka khlaw ha ka por kumba 5 baje janmiet hynne ka sngi.
Iathuh u GPS ba poi Pynursla ka bike ba shah tuh na Mawprem
