Shillong: Ka la mih ka jingiakawang nia ki MDC ka liang pyrshah bad ka Executive Member ka KHADC kaba peit ia ka tnad ain halor ka jingkylli kaba iadei bad ka jingshim pisa ka Council na kiba ialeh mukotduma.
U nongïalam liangpyrshah u Bah Titostarwell Chyne bad u MDC ka Laban-Mawprem u Bah Ricky Shullai ki la khuid tar ïa ka EM ka kong Deity H Majaw kaba peit ïa ka tnad ain halor ka jubab ïa ka jingkylli kiba ïadei bad kaba la wanrah da u Bah Synshar Kupar Roy Lyngdoh Thabah.
Haba jubab ia jingkylli, ka EM ka la pyntip ba ki Court ki buh ïa ka Court Fee halor ki mukotduma katkum ka Khasi Hills Autonomous District Council, Court Fees Rules (Meghalaya Amendment) Act, 1993. Ka la pyntip ba ka Stamp Fee/Court Fee ka don ka la jong ka jingbuh dor kata ka shi lak tyngka kan dei 2% bad bud nangta pat ka dei 3% bad katkum ka Executive Order ha u 2024 bad la pyntreikam katkum ka Order.
U Bah Titostarwell ula buh jingkylli, hato lada ka Order ka ong ban noh sha riat kan leh kumta bad u la buh jingkylli na kano ka kyndon ka Sixth Schedule la pyntrei kam ïa ka Stamp Fee/Court Fee lada ka ka Executive Member ka ong ba pyntreikam katkum ki kyndon Sixth Schedule.
Haba ka EM ka la jubab ba ka EC ka pyntreikam beit ia ka order jong u snem 2024, u Bah Ricky Shullai u la ïeng bad ong ba kam ïahap ban shu kynnoh shi kynnoh ïa ka Executive Order.
Ia kawang nia ki MDC liangpyrshah ia ka EM ha ka dorbar KHADC
