Shillong: Ka Myntri Pla Tyngka bad Corporate Affairs, Nirmala Sitharaman, mynta ka sngi kala buh ia u mawnongrim ban pyntrei ia ki project ba shongdor T.1,246 klur ha Meghalaya ha ka jingiadon ryngkat u Myntri Rangbah, Conrad K Sangma, nalor ki Myntri jong ka Sorkar Jylla, ki Ophisar bad ki kynhun ba don bynta.
Ki project ki kynthup ia ki kam kiba kongsan naduh ka pynpynpoi surok, ka jingpynpoi mar, ki jingtei kam jngohkai, ka pule dangle bad ka jingkyntiew ia ka kamai kajih, bad la khmih lynti ba kan nang pynkhlain shuh shuh ia ki kam khaii pateng bad kyntiew ia ka rukom im ki briew ha kylleng ka Jylla.
Haba ai jingkren ha ka jingialang, ka Myntri Pla tyngka kala pynpaw ia ka jinglong kongsan jong ka thain Shatei Lam Mihngi ha ka lynti iaid ka Ri India ban kiew shaphrang. “Ka thain Shatei Lam Mihngi kam don shuh sha kyndong jong ka khana ka roi ka par ka Ri India. Ka dei kaba la niew kum ka pdeng eh jong ka jingkiew shakhmat ka India, bad ka lawei ba nang kiew shaphrang”. Haba ban jur ia ka bor ba ioh pateng jong ka thain, kala pynpaw ba ka jingeh ka shong ym na ka jingbym don ki lad ki lynti hynrei ban “pynkylla ia kine ki lad ki lynti sha ka jingkiew shaphrang lyngba ki lad pyniasoh kiba kham bha, ki jingtei bad ki kam kiba da thmu”.
Kala ban jur ruh ia ka jinglong kongsan ki Externally Aided Project ha ka ban kynjoh ia kane ka thong, haba pynpaw ba kum kine ki project ki wanrah “ym tang ka jingbei tyngka, hynrei ka jingshemphang ka pyrthei, ka rukom trei kaba paka, bad ki buit treikam ba thymmai ki ba iarap ban pyniasnoh ia kaei kaba ka thain ka don bad ki lad ki lyntu ha ka pyrthei”. Haba kdew ia ki project bala pynlait ha Meghalaya, kala ong ba ki dei kiba la pynwandur ban “pynkylla ia ki kabu ba don ha ka mariang sha ki kam, ka kamai kajih bad ka jingkiew ka ioh ka kot kaba neh slem”.
Haba kren ha ka jingialang, u Myntri Rangbah ula ban biang ia ka bynta ban wanrah jingkylla jong ki Externally Aided Project ha ka roi ka par ka Meghalaya bad pynshai ia ki jingsngewthuh bakla haba iadei bad ka rukom pynbeit ia ka jingbei tyngka. Ula pynpaw “ki Externally Aided Project ki dei kiwei na ki lynti ba treikam bha ban bei tyngka ia ki jingtei kiba heh bad ki kam ba kyntiew ia ka imlang sahlang bad ka ioh ka kot. Jan 90% na ka ram bala shim na ka bynta kine ki project ha ka thain Shatei Lam Mihngi la siew da ka Sorkar India, kiba pynlong ia ki ba kin treikam bha bad ai jingmyntoi bha ia ki Jylla jong ka jong ngi”.
Haba kren halor ka jingbun ki project ba dang iaid mynta, ula pynpaw ba ka Meghalaya ka dang pyntrei mynta ia ki Externally Aided Project ba shongdor palat T.12,000 klur ha ki bynta bapher bapher kum ha ka rep ka riang, ka jingpyntrei ia ki jingtei, ka jingpynmih bording, ka jingpynneh pynsah ia ka mariang, bad ka jingpynroi ia ka sap treikam ki briew. Ula bynrap ba “ka jingthew ba shisha ia ka roi ka par ka dei ka jingktah ba ka wanrah ha ki shnong ki thaw, bad mynta ngi la iohi da ki hajar ki nongioh bynta kiba ki jingim jong ki, kila kylla lyngba kine ki sienjam bala shim”.
U Myntri Rangbah ula pynpaw ruh ia ka jingsngewnguh ia ka Myntri Pla Tyngka namar ka jingai ia ka jingkyrshan ba kyrpang ia ka Meghalaya khamtam ha ka jingmynjur ia ka Meghalaya Logistic and Connectivity Improvement Project na kaei kaba la buh. Ula kynthoh, “Kane ka jingkyrshan ka pyni ia ka jingshaniah bad ka jingkut jingmut jong ka Sorkar India sha ka roi ka par jong ka Meghalaya bad ka thain Shatei Lam Mihngi”.
Pynbna ka Nirmala T. T.1,246 klur ha Meghalaya mar syn wan ha ka sien baar
