Shillong: Ka Raid Mylliem jong ka Hima Mylliem mynta ka sngi, kala sdang ia ka knia ka khriam ha Mawnarian da ka syiar bad u blang.
Ia ka niam ka rukom la pyndep da ki khun ki hajar ka Raid kiba don ha ka niam tynrai niam Khasi ryngkat u 5 kur 11 kur bad u Lyngdoh.
Ka Meghalaya High Court dang shen, ka la hukum ba ki myntri na ki 5 kur 11 kur kiba la kylla ia ka jingngeit niam shawei bad ki bym bud shuh ia ka niam Khasi, kim lah shuh ban leh ia ka niam ka rukom jong ka Raid.
U riew tymmen riewsan bah Daming Nongkhlaw ryngkat ka jingsakhi lang ki khun ki hajar bad u Lyngdoh ka Raid bah Kyrshon Marbaniang ula pyndep ia ka duwai ka phirat ha kane ka sngi bad ia ka syiar bad ka blang la ot bad pom da u rangbah Justingwel Kharkongor.
U riew tymmen riewsan u bah Daming ula batai ba katkum ki dak ki shin na ka syiar bad u blang kila pyni ba ka bit ka biang watla kila kdew ia ki daw katto katne.
Ka jingleh niam kan bteng lashai ka sngi ha katei kajuh ka jaka da ka jingknia da u sniang bad la lashi sngi pat kin leit sha u Lum Shyllong ban pyllong ia ka jingknia da u Syiar bad Blang bad hadien kata, kan sa don ka shad ka kmen haduh ka 1 tarik Jylliew ha lympung shad ha Mawnarian.