Shillong: U kyrtong MP ka NPP u Dr. DRL Nonglait u la ong ba ka longbriew manbriew ka la hiar dor hiar arsut ha kine ki sngi bad ka akor Sohra kaba ju pawnam hynrei mynta haba peit ha Social Media, ym don akor ym burom shuh.
Haba kren ha ka jingialang ban pan jingkyrshan na ka bynta ka elekshon MP shiteng samoi kaban sa long shen ha ka jingialang ha Mawkdok kaba hap ha Sohra konstitwensi mynta ka sngi, u Dr. DRL Nonglait ula pynpaw ia ka jingsngew bynniaw ia ka jinghiar dor ka akor ka burom, ka ktien ka thylliej ha kine ki sngi khamtam ha ki rynsan social media ha kaba la mih tang ki ktien khlem akor.
U la ong ba ka ktien ka thylliej ka la shu pathar ha social media da ki kyntien khlem akor bad jah burom bad kane ka la pyni ba ka longbriew manbriew ka la dum ka la synia.
Ha kajuh ka por, ula ong ba ka Sohra konstitwensi ka dei u syntiew ba itynnad tam jong ka ri Khasi bad ka dei ka jaka jngohkai kaba nyngkong tam kaba la tip shaphang ka ri Khasi bad yn sa nang kyntiew shuh shuh.
Ka kam jngohkai ka Sohra, ka la ai kam ym tang ia ki briew ka Sohra hynrei na kylleng ki jaka, kila ioh kam ioh kamai.
Ula pynkynmaw ia ka kyntien u Soso Tham, kaba ong, nang shai namarkata, ngin nang kham im hok.
Ka akor Sohra haba peit ha social media, ym don akor ym don burom shuh, ong u DRL Nonglait
