Shillong: Ka MDC ka VPP na Mylliem ka kong Aibandaplin L Nonglait ka la ong ba ki khun kynthei ki dei kiba rem dor bad ym dei ban bret bad ibein.
Ryngkat kiwei ki nongialam ka kong Aibandaplin ka la hiar sha shnong Rangshken ban pan jingkyrshan ia u kyrtong MP ka VPP u Dr. Batskhem Myrboh ha ka janmiet sngi Saitjain.
Haba kren ha kane ka jingialang, ka MDC ka Mylliem ka la ong ba kum ki kynthei ki dei ban ri kyndong ia la ka jingim da kaba tip briew tip blei namar ba ki long u mawkor maw rebi.
Ka la ong ba haba ki don bynta bad ka VPP kin ym babe namar ka dei ka jingud jingnam jong ki paidbah ka ri Khasi kiba paid ka dohnud man ka janmiet bad dei hangta u blei u isynei ban pynmih ia ka VPP ban wanrah ia ka jingsynshar kaba khuid kaba suba, ha ka imlang sahlang.
Ka la ong ba ai ba kane ka jingkyrmen kan nang rhem ban ialap ia ka hok bad ka jingshisha.
Ki khun kynthei ki dei kiba rem dor, ong ka kong Aibandaplin
