Shillong: U President ka VPP u bah Ardent Miller Basaiawmoit ula ther ia u Syiem barim ka Hima Mylliem u Paiem Laborious Syiem halor ka jingleit jongu bad ki khun ki hajar ka Hima Sohra ha ka jingleit tur jongki ha ka sngi Palei ban dawa ai sanad ia u Marremdor Syiem kum u Syiem ka Hima Sohra.
Haba kren ha ka jingialang ka VPP ha Mawlai ha ka janmiet, sngi Palei, u bah Ardent ula ong ba uto u rangbah u ju mih bad don bynta bha ha ka NPP, uba la wan ban maham hana wat leh politik ia ka riti. Hynrei kane ka paw ba ka dei ka NPP kaba leh politik lyngba ki kam Hima ban wan kyrkait ha KHADC.
“Uei uto u rangbah u ju mih bha bad don bynta ha ka NPP, ula wan maham wat leh politik ia kata ka riti. Kane ka dei ka jingleh politik ka NPP lyngba ki hima ban wan kyrkait ia ka Executive Committee ka VPP ha KHADC”, la ong bah Ardent.
Ha kajuh ka por, u bah Ardent ula buh jingkylli ia ka jingdawa ban ai sanad noh ia u Marremdor Syiem hynrei ula buh jingkylli hato, ka de imo ka riti ba u Syiem Khynnah ka Hima Sohra un ai wai ia ka jaka sha ka sorkar haduh 60 snem khlem ka jingtip u khun u hajar. U la ong ba ka VPP kam pyrshah riti, kam pyrshah Hima, kam pyrshah shnong hynrei ka ieng ban synshar katkum u Khasi ka dei ban im biang bad kata ka long ba ka bor ka dei ban phai biang sha u paidbah.
“Hato ka dei mo ka riti ba u Syiem Khynnah ka Hima Sohra ula aiwai haduh 60 snem sha ka sorkar khlem ka jingtip u khun u hajar. Ka VPP kam pyrshah ia ki riti, ia ki Syiem, ki rangbah shnong hynrei ka ieng ban synshar katkum u Khasi ba ka dei ban im biang bad kata ka long ba ka bor ka dei ban phai sha u paidbah”, la ong u President ka VPP.
Kane ka jingkren u bah Ardent ka long hadien ba ki paidbah u khun u hajar ka Hima Sohra kila wan tur sha KHADC ban dawa ban ai sanad noh ia u Marremdor Syiem ban long u Syiem ka Hima Sohra.
Kynnoh u bah Ardent ba leh politik ka NPP lyngba ki kam hima ban wan kyrkait ha KHADC
