Shillong: U nongtrei monsngewbha ka jylla u bah Disparsing Rani ula pynpaw ba ka jingkren u bah Ardent Miller Basaiawmoit ba ka jingwanrah ia ka Spa ne ka jingkhem met, kan pyllong ia ka jylla kum ka Sex State, ka dei ka jingialam bakla ia ki paidbah.
Haba kren halor kane, u bah Disparsing ula ong ba ka jingkren u bah Ardent ba ka Meghalaya kan kylla kum ka Sex State ne ka jylla awria, ka dei ka jingkren beain. U la ong ba ha India kam pat don ka ain kaba ithuh ia ka kam khaïi met bad kumno u lah ban ong ba ka dei ka Sex State.
Shuh shuh u bah Disparsing ula ong ba ka jingkren u bah Ardent ka long kaba beain bad ka dei ka jingkren ka bym iahap, wat ka Supreme Court ka la ong ba ka mon laitluid u ne ka briew ym lah ban khang.
Ka jingkren u bah Ardent kan ialam bakla ia u paidbah ba ka jylla kan kylla Sex State, ong u bah Disparsing
