Shillong: Ia ki mawbynna kiba la pynkhreh na ka Seng Khasi Diengiei-Nongthliew la pynbit pynbiang ban leit sha ka lympung ka Seng Khihlang kaba 36 kaban long ha Muthlong, Jaintia Hills ha ka 17-19 tarik mynta u bnai Iaiong 2026.
Shi bynta halor kane, ka Seng Khasi Diengiei-Nongthliew ha ka sngi Balang, ka la pyndep ia ka jinglehniam ban thep ia ki mawbynna hapoh ka kali shwa ban kit ban leit aiti sha ka Muthlong.
Shwa ban thep ia kine ki maw bynna hapoh ka trok, la pyllong ia ka duwai ka phirat bad ka nguh ka dem ha Laitarted bad hadien ba la thep bad pynbiang ia ki, la pyllong pat ia ka jingleit pynbna sha kylleng ki shnong jong ki 12 tnat seng Khasi kiba don ha ka thain Diengiei-Nongthliew ryngkat ka tem ka put ka phawar ka rwai.
U Secretary ka Seng Khasi thain Diengiei-Nongthliew bah Joplang Kharnaior ula ong ba ia kine ki mawbynna yn mih ha ka 17 tarik ban leit buh sha Sein Raij, Muthlong bad ka jingjrong ki mawbynna ka long 16 phut duna u maw kni, 13 bad 12 phut ki maw pyrsa, nangta u maw kynthei bad sa u mawsahnam.
U la ong ba ka rukom rah maw ka dei ka bynta ha ka jaitbynriew Khasi kaba la bud pateng la pateng naduh ki longshwa manshwa.
Ka jingiakynhoi ban rah bad thep ia ki Mawbynna na thain Diengiei-Nongthliew sha lympung ka Seng Khihlang
