Shillong: Ki nongkhleh bad ai dawai ne ki pharmacist kila ioh ban iakynduh ia u myntri ka tnat ka koit ka khiah hadien 5 kynta eiei ba la ap slem.
Hapoh ka shatri ka All Meghalaya Pharmacists Association kila kynduh ia u bah Wailadmiki Shylla ha Secretariat.
U nongaiktien ka seng bah Emos John Syiemlieh ula ong ba ka jingiakynduh ka long kaba sngew tynnad watla ym tip kaei kaban jia hadien.
Ka jingdawa jongki, ka long ban thung kam noh ia ki kam kiba lait kiba la shu sah kumto naduh 2000 khlem pynmih jingbna eiei bad la shu thung kontrak. Kawei pat ka dei ka jingdawa ia ka Indian Public Health Standard (IPHS) ha kaba ki nongkhleh bad ai dawai kin dei ban don la kumno kumno 2 ngut ha ki PHC, 3 ngut ha CHC bad uwei ha Sub-Centre.
Ki la pynsngew ruh ia ka jingdonkam ban pyllong noh ia ka lekshon jong ka Meghalaya Pharmacist Council kaba la shu pyntyllun ia ka kam khlem don kano kano ka elekshon naduh ba la thaw ia ka.
U bah Emos ula ong ba kila dawa ruh ban pynmih paidbah ia ka Service Rules kaba la dep shna ka sorkar bad lada kim pyllait paidbah, kin sa shim biang kiwei ki sienjam.
Shwa ia kane, ki nongkhleh bad ai dawai kila tur sha khyrdop ka Secretariat ban leit kynduh ia u myntri hynrei ki la shah khang noh namar ba ki ong ba dei ban buh sngi lypa shwa ban wan. La pyntip ruh ba u myntri ka tnad ka koit ka khiah bah Wailadmiki Shylla um pat poi sha ophis namar ba u dang donkam sha thain Bhoi. Dei tad haduh janmiet ba kila ap beit khui haduh ban poi u myntri bad ki sa ioh ban iakynduh.
Sngewbang ka jingiakren tangba ym tip, kumno kan long, ong ki nongkhleh dawai
