Shillong: U MLA ka North Shillong bah Adelbert Nongrum ula pynpaw ia ka jingsngew khia bad ka jingsyier ioh ba ka jaka ka sorkar ha Umiam, kaba la aiti sha ka kompeni, kan sa kylla kum ka jaka ha RR Colony ha Rynjah, ha kaba ki nongwei kila kam trai syndon bad die lilam watla ka sorkar ka shu ai tang ba kin shong shipor ha kito ki snem.
U bah Adelbert ula wan jngoh ia u chairman ka Green Tech Foundation u bah H. Bansiewdor Nonglang uba la shah thngan la 6 sngi kynthih ha madan Malki ban dawa ba ka sorkar ka dei ban pyndam noh ia ka jingaiti ia u dewlynnong lumpongdeng, ha Umiam ban tei hotel rem dor.
U bah Adelbert ula ong ba ka jaitbynriew ka dei ban sngewthuh ba ka jingaiti ka sorkar sha ka kompeni ban hotel ha Umiam haduh 66 akar, ka iaryngkat bad 66 tylli ki madan phutbol.
Katei ka jaka ka dei jong ka MeECL ka sorkar jylla ha kaba ka sorkar ka la iasoi soskular bad ka M/S Hotel Umiam Private Limited ban aiti ia katei ka jaka sha ka Indian Hotel Company Limited ba kan tei ia ka hotel rem dor bad ba kan pyniaid haduh 60 snem.
U bah Adelbert ula kynthah ruh ia kane ka sorkar ka jied ia ki briew kiba nabar ban ia ki trai muluk namar ba ha u snem 2024, ka sorkar ka la pyndam noh ia ka jingiateh kaba la ai wai ha u bah Michael N Syiem uba dei u trai muluk bad ka la aiti sha ka kompeni kaba nabar.
66 tylli ki madan phutbol ka jingheh ka jaka ba ai sha kompeni | kaba ma ioh kan kylla kum ka jaka ha RR Colony ha Rynjah: Adelbert
