Shillong: Ki nongdie madan ha ka thain Laitumkhrah kila pyrshah jur ia ka jingthmu ka sorkar ban rah noh ban leit thep sha Parking Lot ha Anjalee.
Katkum ka jingkren jong ki nongialam ka Meghalaya and Greater Shillong Progressive Hawkers and Street Vendors Association (MGSPHSVA) ka Kong Angela Rangad bad u bah Shane Thabah, u secretary kila pyntip ba ha ka jingialang mynta ka sngi, u Chief Executive Officer (CEO) ka Shillong Municipal Board (SMB), ula pynbna ba ka sorkar ka la pynbna ia ka thain Laitumkhrah kum ka jaka bym bit ban shong die madan.
U CEO uba dei ruh u chairman ka Provisional Town Vending Committee (PTVC), ula lum ia ka jingialang ka seng ki nongdie madan mynta ka sngi ban iathir halor kane ka kam.
U bah Shane ula kam ba ha ka jingshisha ka sorkar ka la jied ia ki jaka ban buh ia ki nongdie madan ha ka thain Laitumkhrah hynrei mynta ka la pynmih ia ka jingpynbna ba la pyndam noh ban ithuh kum ka jaka nongdie madan ha thain Laitumkhrah bad kila thmu ban leit thep noh ia ki nongdie madan na Laitumkhrah sha Parking Lot ha Anjalee.
U la pynpaw ba ka jingleh ka sorkar ka bym lah ban pdiang ia kane ka jingleh u CEO namar ba kan pyniap ja ia ki nongdie madan. Ym tang katta, ka sorkar ka la pynkhreh ruh ban pynkynriah ia ki nongdie madan na ka thain Motphran, Umsohsun, Jail Road, ha Phan Nonglait Park bad na Polo sha ki jaka ba ka la pynkhreh.
Khreh leit thep ka sorkar ia ki nongdie madan na Laitumkhrah sha Parking Lot ha Anjalee|Ka Laitumkhrah kam dei ka jaka die madan
