Shillong: Ka shad suk Mynsiem ka seng Khasi Iapdikhar, kaba hap ha Sohiong, ka la nangphuh nangkhie rasong ha kine ki sngi, khamtam hadien ba ki don kiba na kiwei kiba la wan phai biang sha ka niam Khasi.
Ka shad suk mynsiem ka la long mynta ka sngi ha katei ka madan shad ha kaba ki kynthei bad shynrang kila iatuid ban pynnoh ia la ki kjat ryngkat ki riam Khasi tynrai kynjreng ban pyniahap tara bad ka sur jong ka bom ka ksing bad tangmuri.
Ka Seng Khasi Iapdikhar ka don ha ka shnong Laitnongkseh bad ha ka shnong Laitnongkseh don 2 tylli ki tnad Seng Khasi kynthup ka Seng Khasi Iapdikhar bad ka Seng Khasi Laitnongkseh.
Ha ka Seng Khasi Iapdikhar ki don 41 ing, ha ka tnad Seng Khasi Laitnongkseh ki don kumba 32 ing.
Ka shnong Laitnongkseh baroh la kheiñ kyllum ki tnum ing jong ki Nong Shong Shnong ki don 112 ing.
U secretary ka Seng Khasi Iapdikhar, bah Purningstar Shabong ula iathuh ba shwa ban pyllong ia kane ka shad suk mynsiem, la pyllong shwa ia ka knia ka khriam ha katei ka jaka ba u blei nongbuh nongthaw un theh sei ia ka bha ka miat. U la ong ba ha kane ka shad, la shah tang ban iashim bynta ban shad tang kiba don ha ka niam Khasi namar ba ka iaid bad ka knia ka khriam bad kam dei ka shad rongphong.
Nang phuh ka shad iapdikhar ba bun kiba phai biang sha ka Niam Khasi
