Shillong: U MLA ka Mawsynram u bah Ollan Sing Suin ula pynpaw ka jingsngewskhem ba shen ka jingangnud jong ki paidbah ka thain Mawsynram ban kyntiew kyrdan noh ia ka Mawsynram sha ka Civil Sub Division kan sa urlong.
Bunsien u MLA ka Mawsynram ula ju pynsngew ba ka thain Mawsynram ka la ring tymmen na ka daw ka jingsniew tasam ka surok. Hynrei kan sa khie samla biang hadien ba ka sorkar ka la pyndep ia ka kam ban sdang pynbha noh ia ka surok naduh Phlangwanbroi shaduh Ranikor bad kan sa khot tender noh naduh Weiloi sha Phlangwanbroi ban pynheh bad pynbha ia kane ka surok kaba la slem bah kaba neh kumjuh naduh mynshwa.
Mynta ka kynti pat, shen kan sa kiew sha ka jinglong rangbah hadien ba ka sorkar kan pynkiew kyrdan noh na ka Block sha ka Civil Sub-Division, kaba dei ruh ka jingangnud jong ki paidbah ka thain baroh kawei.
Haba kren sha ki lad pathai khubor, u bah Ollan ula ong ba ka Mawsynram kadei ka shnong kaba la biang bad ibit ban kyntiew kyrdan noh sha ka Civil sub-division.
U bah Ollan u la pyntip ba ka Committee ba la ialam da u Chief Secretary ka ladep ban bishar bniah ia ka jingtyrwa bad kaba ladep ai ia ka jingmynjur bad kane ka long ka dak bad sienjam kaba khraw ha ka jingiaid shakhmat ka kam.
Ula ong ba watla katta ka rai ba khatduh kan shong ha ka kynhun Myntri sorkar, kaba dang dei ban iamir jingmut bad ban ai ka jingmynjur ba pura.
Katkum ka jingong u bah Suin, lada la kyntiew kyrdan ia ka Mawsynram sha ka civil sub-division kan iarap ban ai ka jingshakri ba pura bad kaba iajan sha ki paidbah ha katei ka thain.
Ula kdew ba ki nongshong shnong mynta ki iakynduh shibun ki jingeh namar ka jingbym ioh bha ia ka jingshakri ba paka ha kaba bun ki kam bad ki skhim pynroi ki sahteng khlem lah ban iaid shakhmat.
Ula bynrap ba u don ka jingkyrmen ba skhem ba kin ioh ia u soh ba bha namar ba kane kadei ka jingdawa jong ki paidbah kaba la slem bha.
Ha kajuh ka por, ula ong ba na ka liang jong u, ula rah ia kane ka mat ban iakren bad ki Myntri Rangbah u Conrad K. Sangma, ban kyntu ia u ban pynsted ia kane ka kam bad ban rah ha ka jingialang jong ka kynhun Myntri Sorkar kloi katba lah.
Shuh shuh ula ban jur ba ka jingthaw ia ka civil sub-division kam dei eh ba kan wanrah tang ka jingiajan hapdeng ka jingtreikam ka sorkar bad ki paidbah hynrei kan plie lad ruh ia kiwei ki kam pynroi ha kane kam thain.
Hadien ka jingkhie samla, yn sa rangbah ruh ka Mawsynram hadien ba la ioh ia ka Civil Sub-Division
