Shillong: Ka jingiakhih ban pyrshah ia ka jingaiti ka sorkar ia u Lumpongdeng sha ka kompeni Indian Hotels Company Limited (IHCL) Tata Group, kala poi sha khyrdop Secretariat.
Ia kane ka jingiakhih la pyllong da ka Greentech Foundation ban dawa weng noh ia ka jingthmu ban shna ia ka hotel halor utei u lum.
Ban pynjur ia kane ka jingdawa, u Chairman ka Greentech Foundation bah H.B Nonglang ula leit shah thngan marwei hakhmat ka Secretariat.
Ka jingshah thngan ka long khlem buh pud ban dawa ba ka sorkar ka dei ban weng noh ia ka jingthmu ban tei hotel bad ka jingaiti ia katei ka jaka kaba 66 akar sha ka kompeni.
U Bah H.B. Nonglang ula byrthen ba un ym khih na kane ka jaka katba ka sorkar kam pat weng ïa ka jingaiti ïa utei u lum lyngba ka jingthoh.
Ha kane ka jingiakhih, la wan tuklar ki majistor ban bthah ia ki dkhot ka seng ban mih namar kila shu wan khlem jingbit na ka bor district hynrei na ka liang ki dkhot ka Greentech kila pyni nia ba ka sorkar ruh ka shimti khlem jingpynbna paidbah khlem jingsngap paidbah hynrei la shu iasoi hi kumto.
Kila ong ba ka jingpynkhyllem ia ki dieng kala sdang ha Lumpongdeng bad dei ban weng noh shi syndon ia kane ka projek.
Hadien kumba 3 kynta eiei ba u la pynlong ka jingïakhih shong shah thngan ha khmat ka khyrdop Secretariat, ki Pulit ki la rah noh ïa u Bah HB. Nonglang u Chairman ka Green Tech Foundation lem bad ka ar ngut ki nongïalam kiba shynrang lang da kaba thep ia ki hapoh bus hadien ba kim treh ban leit pan jingbit ban shong shah thngan kaba la pynlong ïa ki Pulit ban rah noh ïa ki na katei ka jaka. Kila rah ia u sha Sadar Police Station.
Ha kajuh ka por, ka Voice of The People’s Party, Youth Wing hapoh ka jingïalam u Bah Marbud Dkhar ki la wan ban ai jingkyrshan ïa ka jingïakhih shong shah tngan u Chairman ka Green Tech Foundation u Bah HB. Nonglang ha Secretariat ban pyrshah ïa ka jingaiti ka sorkar ïa ka dewlynnong Lumpongdeng ha Umïam sha ka company ba nabar ka Indian Hotels Company Limited (IHCL) Tata Group, kaba thmu ban shan hotel ha katei ka jaka.
Ki samla jong ka VPP ki ai jingkyrshan ïa ka Green Tech Foundation kaba shim ïa kane ka sienjam ban pynlong ka jingïakhih. U la ong ba ka jingthmu ban tei ïa ki Hotel rem dor ha katei ka jaka bad ka jingwanrah ïa ki company heh spah ba nabar kam pynïoh jingmyntoi ïa ki paidbah hynrei tang na ka bynta ka National Party.
U la ïathuh ba ka party VPP lyngba u President ba Rangbah ki la phah teng ïa ka jingthoh ban pyrshah halor kane ka jingthmu aiti ïa katei ka jaka sha ki company heh spah.
Ka jingiakhih na Lumpongdeng sha Secretariat, rah ki pulit bak ia ki nongialam ka Greentech
