Shillong: Ka seng Hynniewtrep Youth Council (HYC) West Khasi Hills mynta ka sngi ka la kynduh ia u CEM ka KHADC bah Winston Tony Lyngdoh ban dawa ba ka KHADC, ka dei ban ym pynthymmai shuh ia ki trading license ki bar jylla kiba leh kam khaïi ha thain Shahlang bad ha West Khasi Hills.
U President ka seng bah Lumlang Kharsyiemlieh ula ong ba dang shen ka seng ka la hiar sha Shahlang kumba 100 ngut hynrei dang kham bun ki bar jylla bad ula ai jingmut ia ka KHADC ba lada ki hiar shatei ban kyndang, kim dei ban hiar tang 10 ngut namar ba ka lah ban buh jingeh ia ki.
U la ong ba kane ka jingiakynduh ia u CEM ka long hadien ba ka seng ka la khang tala kumba 180 tylli ki dukan ki bar jylla kiba khlem pynbiang ia ka trading License kiba leh ia ki kam khaii ha katei ka thain.
U bah Lumlang ula ong ba ki trai muluk ka West Khasi Hills kynthup ki Lyngngam kila lah ban leh kam khaii hi dalade bad kim donkam ia ki bar jylla ba kin wan kamai spah ha kane ka ri Khasi bad ym dei shuh ban ailad hynrei dei ban iamih para Khasi ban kyntiew khnang ban shngain ka jaitbynriew.
U la ong ba u CEM ula kular ba ka KHADC kan hiar sha Shahlang ha kine ki sngi ryngkat ka jingpynkhreh kaba biang.
Wat hiar tang 10 ngut, ngi la hiar 100 ngut dang bun ki bar jylla ha Shahlang, ong u President HYC
