Babu Kular Khongjirem
Ka la kylla long ka Raibi ba man ka por (bad precedence) ba kane ka sorkar MDA I&II ba la ialam da ka party NPP, UDP, etc. ka la ju mlien bha ban pynjlan shi pynjlan man ka por (re- extend the tenure) jong ki Autonomous District Council la ka dei ha Khasi Hills ne Garo Hills ruh kumjuh hi.Ka jingpynjlan jongki ka don la ka jong ka jingthmu jongki sha lyndet ia kaba ki paidbah ba lui lui bapli(innocent people) kim da tip ne shemphang eh namar ki nang ban pynksan nia da kumne da kumtai.
Ka jingthmu ba kongsan eh jong kino kino ki political party kiba bat ia ka jingsynshar ha ka ri, ka state ne Autonomous Body kalong beit na ka bynta ka jingioh nong politic jongki (for their political gains).Lada ki sngewthuh ba ka don jingma ia ki, kata, kin pyrshang ban thaw lad thaw lynti ban kiar katba lah na kata. Lada ki sngewthuh pat kaban iohnong politic ia ki,wut wut kin leh khlem pynslem wat tang khandiat ruh.
Kajuh ka jingleh jong ka party NPP ia ka GHADC ba ka la rai pynjlan sa 6 bnai wat la ka la dep pynbna ia ka elekshon ha ka 10-04-2026 bad ka la sdang sa ka jingthep kyrteng (filing of nomination papers) hynrei ka la pynsahngeh jubor na ka daw jong ka jingbthei ka jingiakhih paidbah ha West Garo Hills District. Ka party NPP kaba bat ia u lakam synshar ha baroh ar tylli ki bor(GHADC & State Govt.) kala sngewthuh lypa ba ka la duh jingshaniah (loss trust and confidence) ha ki paidbah Garo, kumta, lada pynlong la ka pynlong,ki lah ban rem kput bad duh noh ia ka bor synshar. Ym tang katta, hynrei kan long ruh ka jingjah burom hakhmat ka pyrthei ba ka party ba ioh ban synshar kan rem kput ha ka elekshon. Ym dei eh tang kata, hynrei ka dei ka rukom pyrkhat jong ka party NPP (NPP policy) ba, lada ki sngewthuh ba kine ki MDC jongka kiba myntra (present sitting MDCs) ki lah ban rem noh ha ka elekshon ba kin ialeh, kata, ka ju ai por (extend) shuh ia ki sa 6 bnai khnang ba kin dang ioh tulop bad ioh jingmyntoi shuh sa 6 bnai na ka pisa ki paidbah. Ha KHADC ruh ki leh kumta ha ka por ba long CEM I Bah Pyniaid Sing Syiem. Ha Garo Hills lei jan man ka san snem ba ki pynjlan.Kiwei kiwei ki party kiba bat ia ki bor synshar mynshwa ki kham kiar ban leh kumta namar ki burom ia ka hok ki paidbah shisien san snem lait noh sa tang ba mih ki kynrum kynram ba ki phah shimti da u Administrator.
Lada ki leh pyrshah ia ka mon bad ka hok u paidbah, I kumba ki da kmen, ki da sngewmeng bad sngewsarong pynban. Ki kular da ki nia thiang nia bang, tangba hadien te, kin sa rai pynsahngeh noh kha ma kha. Kane kam jia tang ia ka elekshon sha GHADC hynrei ki sngewsarong bad sngewkhyllew ruh ba ki la ioh pynsangeh noh ia ka surok Fly- Over na Umshyrpi sha Barik kaba ki paidbah ki da angnud shisha ban kham lait na ka dheng kali. Yn nai iakren ia ka kam khappud, ka ILP, ka ktien Khasi ha ka 8th Schedule, nalor bun kiwei pat ki mat ba konsan bad ba donkam ka jaitbynriew jong ngi. Ka Elekshon MP kam jngai shuh ba u paidbah un ai jingsneng biang sa shisien ia kane ka party. Lada phi mlien ban thok bad shukor ia u paidbah, u paidbah ruh khlem artatien un kham stad shuh shuh ban thok bad shukor lem na ka bynta jongphi.
Ka Raibi synshar ha ki District Council
