Shillong: U nongialam ka liangpyrshah u Dr. Mukul Sangma mynta ka sngi ka 9 tarik Nailur 24, ula sangah ia ka sorkar MDA kaba la shu pynsyrwa kai ia ka pisa u paidbah ban pynbiang pahara ia ki riew shimet ki bym donkam satia hynrei tang ba kin ioh iaid pynheh shadem ban pyni khyllew sha ki paidbah.
Haba kren sha ki lad pathai khubor, u Dr. Mukul u la ong ba hato kine ki don jingma eiei ia ka jingim jongki ban pynbiang pahara, kaba la pynwit bad iwit ia ki paidbah.
Kane ka dei ka kam kai ba ka sorkar ka la pyndonkam bakla ia ki pulit bad ka pisa u paidbah, bad un kren tyngeh ia kane ha ka jingialang ka Security Commission.
U la ong ba ha ka sorkar jong u mynshwa ruh ki thung ia ki chairman, hynrei ka sorkar kam ju pynbiang pahara ia ki.
U la ong ba kiba ioh ban pahara ki bor ka ain, ki dei tang kiba don kano kano ka jingma ia ka jingim jongki, hynrei ym ban pyndonkam bakla ia ka bor.
U la buh jingkylli, ruh ba ki chairman, adviser ha ka sorkar, ki ioh pahara pulit kaba long pyrshah ia ka ain.
Ula ong ba un dawa ba kito ki ophisar kiba pynbiang pahara ia ki politishian kiba shu kwah ban iaid pynad shadem, ban pynthut ia ki paidbah, ba ki dei ban siew ia ka pisa baroh kaba kila pyllut ia ki namar ba ka dei ka jong u paidbah, ym dei na pla lajong jongki.
Iaid pynheh shadem ki riew shimet ba ioh pahara sahuh ki pulit’, ther u Dr. Mukul
