Shillong: U Acting Syiem barim ka Hima Langrin u bah Baldwistar Syiemiong ula pynshai ia ki daw kiba la kynnoh pyrshah ia u paiem Nongtei Singh Syiemiong bad ula kam ba ki don 1095 ngut kiba la soi ban pyrshah ia u.
Haba kren mynta ka sngi hadien ba la kynduh ia u CEM ka KHADC bah Winston Tony Lyngdoh, u bah Baldwister ula ong ba ka Hima Langrin ka don 40 tylli eiei ki shnong bad katkum ka riti dustur, ki khun ki hajar kiba dei hok tynrai na ka Hima kiba la kot 18 snem shaneng, ki don bynta ban jied ia u Syiem ka Hima, hynrei la kynnoh ba u paiem Nongtei ula khang lad ia kane ban iashim bynta ki khun ki hajar.
Ula kynnoh ruh ba ula pyllong nongkynti ia ka jaka jong ka Hima kaba khot ka Law Langam Tilla bad Pyndengtanglieh, kaba ju pyniaid ka Hima.
Shuh shuh ula kynnoh ba la pyndonkam bakla ia ka pisa kaba ioh ka hima kum ka bai jaka na ka jingshna ia ka surok kaba la kot sha ka 7 klur tam khlem ai jingkhein kaba shai.
Kawei pat ka daw ka dei ka jingbym thung ia u Public Information Officer jong ka Hima. Shuh shuh ula kam ba ka KHADC ka la pynmih hukum ha ka 18.07.23 ba u Paiem Nongtei um dei ban sei ia ka pisa palat ia ka T.25 hajar khlem ioh jingmynjur shwa hynrei ula pynkhein ia ka hukum bad u dang pyllut palat 5 klur tyngka.
U la ong ba kaba sngew lyngngoh ba ka KHADC ka la pynkiew khet biang ia u wat haba ka la dep sospen ia u bad ki paidbah ka Hima Langrin kim lah ban pdiang ia kane.
Shwa ia kane, ki khun ki hajar ka Hima Langrin kila tur puk mynta ka sngi sha KHADC ban dawa weng ia u paiem Nongtei na ka khet hynrei ka jingiakren bad u CEM ka KHADC kam poi shano shano bad kila ai por 15 sngi, lym kumta kin shim da kiwei ki sienjam.
1000 ngut tam kiba pyrshah ia u Paiem Nongtei | pynshai u Acting Syiem barim ia ki daw
