Shillong: Ki khlieh nongsynshar ka Dorbar Raid 12 shnong kila ai jingmut ia u Executive Member (EM) ka tnad Elaka ka KHADC bah Denzil Reynard Chen mynta ka sngi, ban dawa ban ai noh ia ka sanad ia u Marremdor Syiem uba la jied ka Hima.
Hynrei u EM ula pyneh beit ba ka KHADC kan pyllong ia ka elekshon ban jied Syiem namar ba u don sa uwei uba kyrteng u Planet Syiem, nalor u Marremdor Syiem.
Haba kren sha ki lad pathai khubor, u Secretary ka Raid Mawshuit bah Kyntiewbor Khongshei ula ong la pynsngew ha u EM ba kan bha ba un khot ia baroh ki khlieh nongsynshar ka Hima Sohra kiba kyrshan bad kiba pyrshah, ban iasei ia ki sakhi satar ban tip mano ba dei mano ba lait namar ban shu iathad kam poi shaei shaei.
U la ong ba u EM ula ong ba ka Executive Committee kan pyllong ia ka elekshon namar ba don u Planet Syiem uba kwah ban iakhun ia ka khet Syiem hynrei kane ka dei ka bym lah ban pdiang katkum ka riti dustur bad ka Dorbar Raid kan sa shong pyrkhat halor kane.
U la ong ba ka jingthmu ka KHADC ban pyllong ia ka elekshon ka dei ka jingiuhroit ia ka riti dustur ka Hima Sohra kaba la jied ia u Marremdor Syiem kum u Syiem ka Hima.
U Sordar ka Raid Mawshuit bah Jling Shrieh ula ong ba ka Raid ka la pyndep ia ka niam ka rukom ka pynsum pynshleh ia u Marremdor kum u Syiem ka Hima hynrei don kita kiba wan ban pharep da kumwei. U la ong ba ka Raid Mawmang u dei kum u para ka Raid Mawshuit hynrei haba u leh lyndet ia ka jingkhot wer u hymmen, ka shong ha u.
Kumjuh u bah Henry Lyngdoh u Sordar ka Raid Diengsaw ula ong ba kumba ka paw, u EM um sngap satia ia ka jingpynshai hynrei ban iashai kdar la ai jingmut ia u EM ba un khot lang ia kita kiba pyrshah bad kiba kyrshan ia u Marremdor ban iasei ia ki sakhi satar.
U Sordar ka Raid Kongthong bah Teibor Lynrah ula ong ba na ka liang u EM ula ong ba la dep rai ban pyllong ia ka elekshon hynrei u Planet Syiem um dei shuh na Hima Sohra bad katkum ka riti dustur um lah ban iakhun Syiem.
Ki 12 Raid ki kynthup ka Raid Mawshuit, Raid Kongthong, Raid Pdei, Raid Diengsaw, Raid Rymmai, Raid Mawbawein, Raid Sohkynduh, Raid Warbah-Sder, Raid Tluh-Khohber, Raid Kutmadan-Thangshun, Raid Nongpriang bad ka Raid Mawmang kaba khlem wan lang mynta ka sngi.
Ban shu iapyni nia kam poi shaei shaei, khot baroh ar liang ban sei ia ki sakhi, ong ki khlieh ka Dorbar Raid 12 shnong ia u EM
